لكل محبي الطهي والوصفات الشهية

وجبات لانش بوكس المدرسة | 6 أفكار لوجبات صحية ولذيذة تحضريهم لأولادك للمدرسة

426

حيرة كل سنة اللي بتقابلنا كلنا كامهات الولاد هياخدوا أكل ايه في لانش بوكس المدرسة بتاعهم؟ بنكون عايزين نديهم حاجات خفيفة وفي نفس الوقت تبقي مفيدة وصحية.

يبقي فيها خضار علي سبيل المثال جزر وخيار وفلفل الوان  وفاكهة مثل التفاح والعنب من الحاجات اللي بتقوي مناعتهم جدا

وممكن مرة في الاسبوع نديهم الحاجات اللي بيحبوها حتي لو مش صحية اوي.

بنصحا من النوم الصبح يدوب بنجهز حالنا بسرعة مفيش وقت نقعد نظبط وجبات من البداية عايزين حاجات تبقي سابقة التجهيز او تتعمل قي اقل من خمس دقاىق في الفيديو ده نشوف ولو أفكار بسيطة نساعد بيه بعض

وكل واحد طبعا يخذ اللي يناسبه ويبدل ده مكان ده ويزود وينقص زي ما الولاد يحبوا والمتاح عندنا

لانش بوكس المدرسة

يلا بينا نبتدي علي طول بس الاول نشوف المكونات اللي هنحتاجها

مكونات لانش بوكس المدرسة الأول ⬇️

  • عيش فينو أو عيش بلدي
  • شرائح جبنة رومي
  • لبنة أو جبن ابيض
  • روزبيف
  • خس وخيار وفلفل الوان

تجهيز اللانش بوكس الاول⬇️

  • هنجهز سندوتش فينو أو عيش بلدي ونضع به جبنة رومي ونضع فيه فلفل الوان متقطع شرائح رفيعة بالطول
  • ونعمل كمان سندوتش بالجبنة البيضاء أو اللبنة نستعمل نوع جبن يكون سهل الفرد ونضع معاه خيار متقطع بشكل طولي بطريقة حلوة تجذب الاطفال
  • لو محتاجين سندوتش كمان ممكن نزود واحد نضع به قليل من صوص مايونيز وعليه قطع من الروزبيف وشرائح جبن شيدر وخس
  • في حالة أن الجبن الابيض تكون متماسكة وصعبت الفرد، ممكن نضع عليها ملعقة او ملعقتين من الحليب وبالشوكة نخلطهم جيدا حتي تصبح ناعمة وكريمية
  • آخر سندوتش هنعمله هنحط فيه شوية صغيرة من المايونيز علي الكاتشب ونضع عليها شريحة من الروزبيف وخس
  • ممكن وضع اي نوع من العصائر ويفضل طبعا أنها تكون معمولة في المنزل، هتكون افضل بكثير من العصائر والمشروبات الجاهزة

فكرة لانش بوكس المدرسة الثاني ⬇️

اللانش البوكس التاني هنضع فيه المافن المالح ويعتبر  من اطعم واسهل الاكلات المشبعة جدا واللي طعمه رائع ويعتبر من الاكلات سابقة التحضير ممكن نعمله ونحطه في الفريزر نطلعه من قبلها بشوية وبعد قليل سوف يصبح جاهز

مكونات المافن المالح ⬇️

  • كوب الا ربع من الحليب
  • 2 كوب دقيق
  • 2 بيضة بحرارة الغرفة
  • علبة زبادي حجم صغير 110 جرام
  • ربع كوب زيت زيتون
  • ملعقة كبيرة ممتلئة بيكنج بودر
  • نص ملعقة صغيرة سكر
  • نص ملعقة صغيرة ملح

طريقة عمل المافن المالح ⬇️

  •  في طبق عميق نضع 2 بيضة بحرارة الغرفة
  • وعليهم نضيف كوب الا ربع من الحليب
  • وربع كوب زيت زيتون
  • وعلبة الزبادي
  • والملح والسكر وايضا نضع البيكنج بودر
  • نخلط كل المكونات مع بعضها جيدا حتي يختفي البيض تماما ويصبح القوام كريمي وناعم
  • ثم نضيف 2 كوب من الدقيق المنخول، نضيفهم واحنا بنقلب، بلاش نضيفه مرة واحدة حتي لا تتكون كتل
  • نخلط المكونات كلها جيدا حتي يختفي الدقيق نوقف خلط
  • ثم نضع شوية من الخضار خضار، لاعطاء طعم ومذاق مميز، وايضا لزيادة القيمة الغذائية لوحدات المافن المالح
  • نضع فلفل الوان ربع واحدة من كل نوع مقطعة مكعبات صغيرة
  • وربع كوب من الزيتون الاخضر او الاسود مقطع مكعبات صغيرة
  • نخلط المكونات كلها تندمج مع بعضها، قوام الخليط تقيل شوية لكن في حالة أن الخليط يكون تقيل جدا ممكن اضافة ملعقة أو ملعقتين من الحليب لظبط القوام

تابعي أيضاً: طريقة عمل كب كيك الشوكلاتة بطريقة بسيطة وطعم رائع

  • وهنكون محضرين صينية الكب كيك مدهونة ب اي مادة دهنية وعليها رشة من الدقيق مغطية الصينية كلها
  • نملا قوالب الكب كيك بالخليط
  • ممكن نضع علي الوجه شرائح زيتون اخضر او اسود
  • وممكن نمسح الوجه بصلصة البتزا لاعطاء طعم البيتزا
  • نضع علي الوجه رشة من البابريكا والزعتر
  • ندخلها فرن ساخن مسبقا علي درجة حرارة 170 تأخذ من 25 ل 30 دقيقة
  • ونختبر نضجها من المنتصف، بعود خشب إذا كان به عجين نتركه خمس دقائق أخري
  • وفي الاخر لو احتاجت ممكن نفتح عليها الشواية الوجه يأخذ لون حلو
  • نضع وحدات المافن علي شبكة ونتركها حتى تهدأ
  • طعمها وريحته حلوة اوي وهتعجب الولاد جدا

تحضير اللانش البوكس التاني ⬇️

  • نضع واحدة أو اثنان من المافن المالح
  • ونضع معاهم شوية خضار فلفل ألوان وممكن جزر وخيار
  • وممكن وضع حاجة حلوة، حطيت شوية صغيرة من الكورن فليكس بالشوكولاتة، الولاد بيحبوه جدا وبيعتبروه زي المقرمشات كده
  •  وحتي تكتمل عناصر الوجبة الغذائية لابد من وضع  اي نوع فاكهة متوفر عنب أو تفاح او فراولة أو توت

و كده أصبحت وجبة اللانش بوكس الثاني وجبة متكاملة فيها كل العناصر غذائية اللي محتاجها الاطفال.

نبدأ في تحضير مكونات اللانش بوكس الثالث

لانش بوكس سهل وبسيط، ويحتوي علي عناصر غذائية مختلفة، ممكن نجهز مكوناته من بليل ونغلفها جيدا حتي لا تتعرض للهواء ونضعها في الثلاجة

لانش بوكس المدرسة الثالث ⬇️

  • عيش تورتيلا أو عيش شامي
  • لبنة أو جبن كريمي
  • روزبيف او تركي أو ممكن نستغنا عنهم ونكتفي بالجبن فقط
  • خس وخيار وجزر
  • جبن شيدر
  • روزبيف
  • والفاكهة تفاح
  • بسكوت حلو

طريقة تحضير اللانش بوكس الثالث ⬇️

  • نفرد عيش التورتيلا
  • وعليه نضع لبنة أو جبن كريمي، نفردها عليه من الطرف للمنتصف
  • نضع شريحة جبن شيدر وخس ممكن اضافة تركي أو روزبيف وممكن الاستغناء عنهم
  • نلف العيش رول مع لم المكونات كلها بالداخل
  • وعلي الطرف ممكن وضع مسحة جبن تمسك الطرف
  • نقطعها علي 5 أو 6 قطع ونضعها في اللانش بوكس
  • ثم نضع في علبة أو جزء من اللانش بوكس اي خضار بيحبوا طعمه مثل الخيار والجزر مقطعين بشكل حلو
  • في علبة أخري نضع عنب
  • وممكن إضافة واحدة أو اثنان من البسكوت الحلو

أصبحت الآن وجبة اللانش بوكس الثالث جاهزة، نبدأ في تحضير اللانش بوكس الرابع

الوجبة ديه من اكثر الاكلات اللي بنعتبرها صحية ومفيدة ومفيهش اي حاجة مصنعة، مكوناتها معمولة في المنزل بها كل العناصر الغذائية

فكرة لانش بوكس المدرسة الرابع ⬇️

  • فول مدمس يفضل يكون مدمس في المنزل
  • فلفل الوان مقطع مكعبات صغيرة
  • حلاوة طحينية
  • عنب
  • زبادي سادة أو بالفاكهة

طريقة تحضير اللانش بوكس الرابع ⬇️

  • فول متدمس في البيت، نهرسه ناعم، ونضيف عليه فلفل الوان مقطع مكعبات صغيرة وطحينة وملح وكمون و زيت زيتون
  • نخلطهم مع بعض
  • نضعهم في عيش بلدي ممكن نعمل نص او رغيف كامل
  • نعمل معاهم سندوتش حلاوة أو مربي وممكن إضافة قشطة
  • وعشان نكمل القيمة الغذائية نضع في علبة جانبية عنب مفصص من العنقود ومغسول جيداً
  • نضع ايضا في اللانش بوكس زبادي سادة او بالفاكهة او ممكن اضافة لبن رأيب من الحاجات المفيدة جدا

اللانش بوكس الرابع أصبح جاهز ومكتمل القيمة الغذائية، نبدأ في عمل اللانش بوكس الخامس

الوصفة الخامسة اللي هنعملها بسيطة وطعمها لذيذ وحلو جدا، ممكن تجهيزها من بليل ووضعها في الثلاجة والصبح نحطها في شنطة اللانش بوكس

مكونات لانش بوكس المدرسة الخامس ⬇️

  • لبنة أو جبن ابيض
  • توست او فينو أو عيش بلدي
  • زعتر
  • زيت زيتون

طريقة تحضير اللانش بوكس الخامس ⬇️

  • نضع لبنة او جبن ابيض
  •  ونضيف عليها ملعقة صغيرة من الزعتر
  • وشوية من زيت الزيتون
  • ونقلبهم جيدا
  • نفرد الجبن في توست او ممكن عيش بلدي او فينو اي حاجة منهم ونضيف معاها خس بيبقي طعمها حلو اوي
  • ثم نقسمها الي نصين ونضعها في اللانش بوكس
  • وهنضيف أيضا حاجة حلوة وبسيطة بالتوست
  • نقطع التوست علي شكل دائرة، هنحتاج لكل واحدة اتنين من التوست ونفرد عليها مربي او نوتيلا، ثم نضع عليها شريحة التوست الأخري نلزقهم ببعض ونضعهم في اللانش بوكس
  • نضع ايضا في اللانش بوكس خضار جزر وخيار وممكن إضافة الخس
  • ونضيف أيضا فاكهة مثل الكيوي نقشره ونقطعه شرائح

اللانش البوكس الخامس أصبح جاهز ومكتمل الي حد ما العناصر الغذائية

نبدأ في اخر لانش بوكس وده بسيط وممكن اي حد يعمله بسهولة

مكونات لانش بوكس السادس⬇️

  • كرواسون أو باتيه
  • جبن شيدر
  • روزبيف او تركي

طريقة تحضير اللانش بوكس السادس ⬇️

  • نفتحها من المنتصف ونضع بها اي حشوة نحبها مش شرط روزبيف او جبن ممكن نكتفي بنوع واحد منهم، الأهم وضع كمية من الخس
  • وايضا وضع جزر الحجم الصغير بيكون طعمه حلو جدا عن الحجم الكبير
  • ممكن وضع نوع من الحلو الخفيفة مثل الدانيت أو نستبدلها بفاكهة تفاح او عنب أو كيوي أيضا ممكن اضافة كمثري مفيدة ومغذية جدا

غيروا في الوصفات وبدلوا فيها زي ما تحبوا

الأهم إضافة خضروات طازجة وفاكهة

ممكن عمل سندوتشات من البانيه أو الاستربس أو الكفتة لكن مش كل يوم ممكن مرة في الأسبوع فقط

الجبن عند شراءها نتأكد أنها مصنوعة من حليب طبيعي وليس بها دهون مهدرجة

اتمني اكون أفدتكم ولو بجزء بسيط، ولمعرفة تفاصيل اكثر عن الوصفة والمكونات يمكنكم متابعة الفيديو

بالهنا والشفا يارب

بالهنا والشفا

 

تعليق 1
  1. […] جدا للانش بوكس المدرسة او في الجامعة او حتي واحنا رايحين الشغل ومناسب أيضا في […]

التعليقات مغلقة.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبول قراءة المزيد