هعمل معاكم النهاردة وصفة بتجمع بين اكثر حاجتين بنحبهم المكرونة والجبن، هنعمل كرات ماك اند تشيز وديه من أكثر الاكلات اللي بنحب نأكلها من بره، مع أن طريقة تحضيرها في البيت سهلة جدا، وطعمها في البيت مع المكونات اللي بنضيفها بيخلي طعمها احلي بكثير من المطاعم.
هنعملها بس بطريقة مختلفة شوية عن الطريقة التقليدية، هنعمل كرات مكرونة جواها جبنة سايحة وعلي الوش طبقة كرسبي طعمها بيبقي رهيييب
وهنعملها كمان صوص مكوناته بسيطة لكن طعمه أكثر من رائع
يلا نبتدي في شرح الوصفة بس الاول نشوف المكونات اللي هنحتاجها
مكونات سلق المكرونة
- 250 جرام مكرونة حجم صغير
- ملعقة كبيرة ملح
- ميه لسلق المكرونة
صوص الجبن
- 2 ملعقة كبيرة زبدة
- 2 ملعقة كبيرة دقيق
- كوب ونص حليب
- 3 أو 4 ملاعق كبيرة قشطة ( اختياري )
- كوب جبن شيدر
- جبن موتزريلا
- نص ملعقة صغيرة ملح – بابريكا – بودرة ثوم
- ربع ملعقة صغيرة فلفل حار
صوص تغطية المكرونة في الاخر
- معلقتين زيت زيتون
- 2 فص ثوم مفروم
- ملعقة صغيرة صلصة
- نص مكعب مرقة دجاج
- ملعقة صغيرة ريحان
- ملعقة صغير زعتر
- نص ملعقة صغيرة سكر
- رشة فلفل اسود
- كوب كريمة طهي
طريقة عمل كرات ماك اند تشيز
اول حاجة هنعملها هنسلق المكرونة
- حلة علي النار فيها ميه بتغلي
- هنضيف عليها ملعقة كبيرة من الملح
- ونضيف المكرونة، ويفضل اختيار نوع المكرونة يكون حجمها صغير
- هنسويها نص سوي فقط، بنحسب لها الوقت من بعد ما تغلي 5 دقائق
- ثم تصفي وتترك جانبا
تحضير صوص الجبنة
- طاسة علي النار نضع فيها 2 ملعقة كبيرة زبدة، و2 ملعقة كبيرة دقيق
- نشوحهم بسيط الدقيق يخد لون ذهبي خفيف
- ثم نضع عليه كوب ونص من الحليب، نضعه مع التقليب المستمر
- نتبله بنص ملعقة صغيرة من الملح – والبابريكا – والكركم – الثوم البودر، وربع ملعقة صغيرة من الفلفل الحار
- نقلبهم جيدا وقبل ان نطفأ النار هنضع 3 أو 4 ملاعق كبيرة من القشطة وهي اختياري لكنها بتعزز الطعم أكثر
- ثم نطفي النار، ونضيف الجبن، هنحتاج لكوب من الجبن الشيدر وممكن إضافة جبن موتزريلا تعطي مطة وقوام حلو لصوص الجبنة
- نخلط الجبن مع الصوص جيدا حتي يصبح القوام ناعم وكريمي جدا
- نضيف عليه المكرونة المسلوقة، ونقلبهم جيدا المكرونة تندمج مع صوص الجبنة
- ثم نضعها في طبق مسطح واسع بحيث تكون مفرودة في الطبق
- نضعها في الثلاجة نص ساعة فقط حتي يتماسك صوص الجبنة مع المكرونة
- ثم نبدأ في تشكيلها لكرات حجمها متوسط
- ناخذ كمية بملعقة كبيرة أو ملعقة ايس كريم، ونضغط عليها جيدا ونشكلها كورة بحجم متوسط
- نشكل كل الكمية ثم نضعها تتماسك قليلا في الثلاجة أو الفريزر
- هتكون مجهزين 3 اطباق، واحد فيه بيض وعليه رشة ملح وفلفل، وطبق فيه دقيق، وطبق فيه بقسماط كرسبي أو ناعم المتوفر منهم
- نضع كرات المكرونة في الدقيق نغلفها بيه كويس اوي
- ثم في البيض
- ثم البقسماط ونغطيها بيه جيدا
- ممكن نسويها علي طول أو نضعها في الثلاجة تتماسك الطبقة علي الوش
- ونسويها في زيت غزير ساخن
- نضع عدد متوسط من كرات الجبنة ونقلبها علي طول حتي تأخذ كلها لون واحد
- وعندما يصبح لونها ذهبي نطلعها علي شبكة أو مصفأة، منسبهش علي النار كتير عشان متفكش والجبنة تطلع منها.
تابعوا أيضاً: طريقة تحضير المكرونة بالصوص الوردي
تحضير صوص لذيذ جدا لتغطية كرات ماك اند تشيز
-
- في طاسة علي البارد نضع ملعقتين من زيت الزيتون
- وعليهم هنضيف 2 فص ثوم مفرومين ناعم
- وملعقة صغيرة من صلصة الطماطم
- ونص مكعب مرقة
- وملعقة صغيرة من الريحان والزعتر، نفركهم باايدينا يطلعوا ريحتهم الحلوة
- ورفعتهم علي نار هادئة، نقلب المكونات مع بعضها تذوب فقط
- ثم نضيف كوب من كريمة الطهي
- نقلب الخليط جيدا واول ما يغلي نطفي النار
وكده كرات المكرونة اتحمرت والصوص أصبح جاهز، نقدمها وهي ساخنة
في طبق التقديم نضع الصوص وعليه كرات المكرونة، وممكن إضافة الصوص علي الوش
طعمها رائع مقرمشة من بره، ومن جوه طرية وعايمة في صوص الجبنة اللي مديها طعم خطير
الصوص كمان علي اد أنه بسيط لكن طعمه رهيييب وهو أساسي مع الوصفة ديه لانه بيعطي طعم ومذاق مميز لكرات المكرونة
جربوها ومتأكدة أنها هتعجبكم جدا وبالف هنا علي قلوبكم مقدما
ولمعرفة تفاصيل اكثر عن الوصفة والمكونات والطريقة يمكنكم متابعة الفيديو
التعليقات مغلقة.