وصفة النهاردة هنعمل اسرع والذ وجبة غداء، هنعمل الفريك بالمشروم والكريمة، طبق خطير طعمه مختلف عن اي فريك دوقتوه قبل كده
هنعمله من غير لحمة ولا فراخ و الوصفة كلها هتتعمل في حلة واحدة.
تعتبر وجبة كاملة مش محتاجين جنبها نعمل اطباق جانبية هو طبق السلطة فقط.
يلا بينا نبتدي في عمايلها بس الاول نشوف المكونات اللي هنحتاجها
مكونات الفريك بالمشروم ⬇️
- كوب ونصف فريك ناعم
- ربع كيلو من المشروم الطازج
- بصلة متوسطة
- 2 أو 3 فصوص من الثوم
- 2 ملعقة كبيرة ممتلئة سمن او زبدة
- 2 كوب من الشوربة ( ممكن نستخدم أكثر أو أقل حسب التسوية )
- كوب ونص من كريمة الطهي
- نص كوب من الجبن البارميزان
- ربع كوب من الجبن الموزريلا
- ملح وفلفل وبابريكا
طريقة تحضير الفريك ⬇️
- اول حاجة هنحتاج لوصفتنا ربع كيلو من المشروم الطازج هنمسحه كويس اوي بمناديل او فوطة مطبخ وهنقطعه شرائح حجمها متوسط
- في حلة أو طاسة عميقة اللي هنسوي فيها الوصفة كلها نرفعها علي النار
- نضع فيها معلقة كبيرة من السمن ممكن تستعملوها زبدة او زيت ونضيف عليها المشروم بعد تقطيعه
- نشوح المشروم في السمن لحد ما يخذ اللون ذهبي الحلو ده ونتركه يتشوح علي نار هادئة
- ثم نأخذ منه شوية نحتفظ بيهم لنضعهم في الاخر علي الوجه.
- نضع علي باقي كمية المشروم، بصلة متوسطة مفرومة و2 أو 3 فصوص من الثوم هنفرمهم ناعم
- نشوح الكلام ده كله مع بعضه يخذ اللون الذهبي الحلو ثم نضع كوب ونص من الفريك المغسول جيدا و مصفي من ميته
- يفضل عدم نقع الفريك حتي نحتفظ بريحة الدخنة الحلوة اللي بتكون موجود فيه، نقوم فقط بغسله جيدا وتصفيته من الماء واستخدامه مباشرة
- نضيف الفريك علي المشروم ونشوحه جيدا علي نار هادية ونتبله بمعلقة صغيرة من الملح مع مراعاة عدم زيادة الملح لاننا سوف نضع شوربة او مكعب مرقة
- نضع أيضا معلقة صغيرة من الفلفل الأسود
- يفضل استخدام فلفل اسود مجروش خشن بيكون طعمه مع الفريك احلي بكتير ما يكون ناعم ومعلقة صغيرة من البابريكا
- نقلب الفريك مع التوابل تتشوح جيدا ثم نضع عليه 2 كوب من شوربة الدجاج الساخنة
- ممكن نستخدم مياه ساخنة ونقوم باذابة فيها مكعب مرقة دجاج
- نترك الفريك مع الشوربة يغلي علي نار عالية ثم نغطيها ونتركها علي نار هادئة تقريبا نص ساعة حتي يستوي الفريك جيدا ويصبح طري مش ناشف
تابعي أيضاً: طريقة عمل الأرز المبهر باللحمة والخضار والنكهات الأسيوية
- نضيف عليه كوب ونص او 2 كوب من كريمة الطهي ونضيف عليهم أيضا ربع كوب من الجبن الموزريلا ونص كوب من الجبن البارميزان بتعطي طعم رائع للفريك
- نقلبهم تقلبتين فقط المكونات كلها تسخن مع بعضها ونطفئ النار مباشرة
- الفريك في الوصفة ديه بيكون جوسي وطري جدا مبيبقش مفلفل عشان كده نراعي عدم ترك الكريمة تغلي فترة طويلة مع الفريك والجبن
- وايضا نراعي إضافة الكريمة والجبن قبل التقديم مباشرة، حتي لايتشرب الفريك الكريمة كلها وحتي تظل طرية وبها كمية كافية من الكريمة
- نزينها من علي الوجه بشوية مشروم وشوية كريمة ورشة جبن بارميزان
ودوقوا بقي احلي واطعم فريك ممكن تعملوه طعمه رائع، طري وكريمي جدا جربوه هيعجبكم جدا وقولولي رأيكم في الكومنت
ولمعرفة تفاصيل اكثر عن الوصفة والمكونات يمكنكم متابعة الفيديو
بالف هنا علي قلوبكم مقدما
التعليقات مغلقة.