النهاردة هنعمل مع بعض طريقة عمل الرز المبهر بالدجاج، وهي تعتبر واحدة من اسهل واسرع الاكلات اللي ممكن تعمليها.
اكلة تتعمل كلها في حله واحدة، مكوناتها بسيطة وبتعتبر وجبه كاملة مش محتاجين معاها غير طبق سلطة زبادي.
وتعتبر كمان من الاكلات اللي بتنجز في اي وقت نكون محتاجين فيه اكلة سريعة ولذيذة في نفس الوقت، وكمان تشرفك علي سفرتك في اي عزومة.
يلا بينا نبتدي في شرح الوصفة بالتفصيل بس الأول نشوف المكونات اللي هنحتاجها
مكونات الرز المبهر بالدجاج ⬇️
- دجاج مخلي أو بالعظم
- كوب ونصف ارز بسمتي
- 1 حبة فلفل احمر وفلفل اخضر
- فلفل حار اختياري
- 1 بصلة
- جزرة مبشورة
توابل تتبيلة الدجاج ⬇️
- ملعقة صغيرة ملح – فلفل اسود – بصل بودرة – ثوم بودرة- بابريكا
- ملعقة كبيرة كسبرة ناشفة
- 3 ملاعق كبيرة ممتلئة خل بلسميك
- عصير ليمونه
توابل الارز البسمتي ⬇️
- نص ملعقة صغيرة ملح – كمون
- ملعقة صغيرة كسبرة ناشفة
لمعرفة تفاصيل اكثر عن الوصفة والمكونات يمكنكم متابعة الفيديو 👇
طريقة تتبيل الدجاج ⬇️
- الأكلة دي تتعمل باي قطع دجاج، بالعظم أو صدور أو وراك مخلية وديه اللي هنعمل منها وصفتنا انهاردة
- كمية الدجاج المستخدم في الوصفة كيلو الا ربع من الوراك المخلية
- نحضر قطع الدجاج ونغسلها ونصفيها تمام من ميتها
- نقوم بتنظيفها من اي جلد زيادة أو دهون أو اي حاجة شكلها مش حلو
- نقطع كل واحدة منهم الي 4 قطع، أو ممكن نقطعها الي نصفين فقط، أو نتركها سليمة كما هي
- نجمع كمية الدجاج كلها في طبق عميق، ونتبلها بملعقة صغيرة من كل حاجة ( ملح وفلفل اسود وثوم بودر وبصل بودر وبابريكا ) وملعقة كبيرة ممتلئة من الكسبرة الناشفة، واخر حاجة هنضيفها 3 ملاعق كبيرة ممتلئة من الخل البلسميك يعطي للدجاج طعم شهي ولذيذ جدا، وعصير ليمونة
- نقلب الدجاج في التتبيلة كويس جدا
- ونتركها 10 دقائق على بال ما نجهز بقية المكونات ولو عندكم وقت ممكن تسببها في التتبيلة فترة أطول
تقطيع وتجهيز الخضار⬇️
- هنحتاج لحبة واحدة من الفلفل الاحمر والفلفل الاخضر هنقطعهم مكعبات حجمها كبير شوية، الفلفل الاحمر في الوصفة دي مهم جدا بيعطي طعم رائع مع الارز
- وهنحتاج أيضا واحد او اثنين من الفلفل الحار، نضعهم مقفولين زي ما هما يعطوا طعم خفيف للارز لكن مش هيخلوه سبايسي خالص
- وبصلة مفرومة فرم خشن يعني قطع البصل فيها تبقى واضحة مش ناعمة اوي
- و جزرة مبشورة
- نقوم بغسل كوب ونصف من الارز البسمتي، نغسله جيدا ثم ننقعه لمدة نصف، ممكن طبعا نستخدم الارز المصري بدل البسمتي
وكده كل حاجه بقت جاهزه معانا نبتدي نسويهم علي طول
طريقة تسوية الرز المبهر بالدجاج ⬇️
- حلة على النار نضع فيها 4 ملاعق كبيرة ممتلئة من زيت الزيتون، مع ملعقة كبيرة من الزبدة، نترك الزبدة والزيت يسخن
- ثم نضع عليهم قطع الدجاج
- النار هتكون عالية علشان قطع الدجاج متنزلش ميتها وتحتفظ بالسوائل داخلها، وده بيخليها طرية ومش ناشفة
- نتركها تتحمر وتخذ لون ذهبي حلو، ثم نقلبها علي الناحية الأخري تتحمر وتخذ كلها لون واحد
- ثم نقلبهم كلهم مع بعض لمدة دقيقتين تكمل تسويتها
- قطع الدجاج هتكون استويت ثلاث ارباع سوي نرفعها في طبق ونتركها على جنب شوية
- لو هنستخدم دجاج بالعظم نتركه علي نار هادئة يستوي تماما
- وعلى الدهون الباقية من تحمير الدجاج، هنضع ملعقة من الزبدة وملعقة كمان من زيت الزيتون
- نشوح فيهم البصل تقلبتين بس يا دوب يدبل خفيف
- ثم نضيف عليه الجزر المبشور، ونشوحه مع البصل تشويحة بسيطة جدا
- ثم نضيف عليهم الفلفل الاحمر والأخضر والفلفل الحار، نقلبهم مع بعض دقيقة بس ياخذوا لسعه بسيطة
- نصفي الارز البسمتي من ماء النقع جيدا ونضيفه عليهم
- نشوح الارز مع البصل والخضار جيدا، ونضيف عليه نصف ملعقة صغيرة من الملح والكمون وملعقة صغيرة من الكسبرة الناسفة.
تابعي أيضاً: طريقة عمل الارز المعمر الفلاحي
- نقلبهم جيدا، ونضع قطع الدجاج علي وش الارز
- ثم نضيف عليه الماء الساخن أو الشوربة أو مكعب من المرقة يعطي طعم ومزاق مميز للارز
- كل كوب من الارز البسمتي يأخذ كوب من الماء الساخن
- بلاش نزود مياه كتير في الاول عشان الارز ميعجنش، وإذا احتاج مياه ممكن نزود شوية صغيرة
- ثم نترك الارز يغلي ويتشرب شوية من ميته
- ثم نغطيه ونتركه علي نار هادئة من 15 ل 20 دقيقة حتي يكمل تسويته
- إذا احتاج ماء زيادة ممكن نضع ملعقة أو اتنين من الماء الساخن ونطفئ عليه ونتركه 5 دقائق فقط يكمل تسويته علي بخارهم
- الارز البسمتي من الاكلات اللي تتعمل قبل التقديم مباشرة، واول ما يستوي نضعها في طبق التقديم ولا يترك في الحلة فترة طويلة حتي لا يعجن
- عند إضافة شوربة أو مرق فورية أو مكعب دجاج لا نقوم بوضع الملح حتي نظبط الطعم وإذا احتاج نضيف
التقديم ⬇️
- الارز بعد التسوية مفلفل ومستوي كويس جدا وبدون إضافة ماء زيادة، شارب من طعم الدجاج ومن التتبيلة وطعمه أكثر من رائع
- قطع الدجاج ايضا مستوية كويس جدا وطعمها حلو اوي
- نضع الارز في طبق التقديم وعليه قطع الدجاج ورشة من الكسبرة الخضراء، ويقدم بالف هنا
وصفة لذيذة جدا وطعمها رائع، واهم حاجة بتتعمل وقت بسيط، ومكوناتها أيضا بسيطة وتقريبا متوفرة عندنا في البيت
ولمعرفة تفاصيل اكثر عن الوصفة والمكونات يمكنكم متابعة الفيديو
جربوها وبالف هنأ علي قلوبكم مقدما
التعليقات مغلقة.