هعمل معاكم النهاردة وصفة من الوصفات الحلوة واللذيذة، هنعمل كب كيك الشوكلاتة و هنحشيه من جوه بصوص شيكولاته، ونزينه بكريمة شوكلاتة طعمها لذيذ جدا.
نحضره بطريقه بسيطه ولا هنحتاج عجان ولا خلاط بالمضرب اليدوي فقط. بيطلع هش وناعم وطعمه بيبقى رائع.
وفي التقديم كمان بيبقى شيك جدا وفي أي مناسبة يشرفك.
يلا بينا نبتدي في شرح الوصفة بالتفصيل بس الأول نشوف المكونات اللي نحتاجها ⬇️
مكونات كب كيك الشوكلاتة
- 2 كوب دقيق 250 جرام
- 1 كوب سكر – 2 ملعقة كبيرة 170 جرام
- نص كوب زبدة + ملعقة كبيرة ممتلئة 120
- كوب الا ربع حليب 200 جرام
- 3 ملاعق كبيرة كاكاو 30 جرام
- 2 بيضة بحرارة الغرفة
- ملعقة كبيرة بيكنج بودر
- نص ملعقة صغيرة بيكنج صودا
- ملعقة صغيرة فانيليا
- ملعقة كبيرة خل
- ربع ملعقة صغيرة ملح
مكونات الكريم شانتيه ⬇️
- 90 جرام من الكريم شانتيه البودر
- كوب الا ربع حليب مثلج ( ممكن اضافة القليل من اللبن إذا احتاج القوام )
- كاكاو خام من 3 ل 4 ملاعق حسب اللون المطلوب
- ممكن اضافة ملعقة أو اثنان من السكر البودرة لظبط طعم السكر
طريقة تحضير صوص الشيكولاتة السريع لحشو الكب كيك من الداخل ⬇️
- ربع ملعقة صغيرة ملح
- نص كوب زيت نباتي أو زبدة
- نص كوب حليب او ماء
- نضع نص كوب سكر بودرة
- نص كوب حليب بودرة
- نص كوب كاكاو خام
- واختياري إضافة كوب الا ربع من القشطة
- نخلط كل المكونات جيدا بالمضرب الكهربائى أو في الخلاط حتي نحصل علي قوام كريمي وناعم
- نضعها في الثلاجة من ساعة بساعة ونصف حتي يصبح القوام كريمي ومتماسك قليلا مثل النوتيلا
لمعرفة تفاصيل اكثر عن الوصفة يمكنكم متابعة الفيديو ⬇️
طريقة تحضير عجينة كب كيك الشوكلاتة ⬇️
- اول حاجه هنعملها نخلط المواد الجافة مع بعضها
- نحتاج 2 كوب من الدقيق متعدد الاستخدامات
- نضيف عليه ملعقة كبيرة ممسوحة من البيكنج باودر
- وربع ملعقة صغيرة من الملح
- و ملعقة صغيرة من البيكنج صودا لو مش متوفرة ممكن نستغنى عنها ونغير البيكنج بودر بدل ملعقة كبيرة ممسوحة تبقي ملعقة كبيرة ممتلئة
- نخلطهم مع بعض كويس
- ونتركهم جانبا ونجهز باقي المكونات
- في اناءعميق نضع كوب الا ربع من الحليب
- ونضيف عليه نصف كوب من الزبدة مع ملعقة كبيرة ممتلئة زبدة، ممكن نستعمل الكمية كلها زيت، أو نص زبدة ونص زيت زي ما تحبوا
- ونضيف عليهم ثلاث ملاعق كبيرة ممتلئة من الكاكاو الخام الغير محلا
- نرفعهم على نار هادئه الحليب يسخن براحته و الزبده تسيح على بال ما نخلط باقي المكونات
- في بولة عميقة نضع 2 بيضة بحرارة الغرفة
- وكوب من السكر بس ننقص منه ملعقة كبيرة
- وملعقة كبيرة من الخل
- وملعقة صغيرة من الفانيليا
- نخلطهم جيدا بالمضرب اليدوي، الي أن يصبح لون البيض فاتح
- ثم نرفع الحليب بالزبدة والكاكاو من علي النار ونقلبهم جيدا نتأكد ان الكاكاو ذاب تماما
- ثم نضيفه علي خليط البيض والسكر مع التقليب السريع واحنا بنضيفه
تابعي طريقة عمل كيكة الشوكولاته بطريقة سهلة جدا وطعمها أكثر من رائع
- ونخلط جيدا حتي تمتزج كل المكونات مع بعضها
- ونضع عليهم الدقيق شوية بشوية مع الخلط برفق وفي اتجاه واحد حتي لا تتكون كتل صغيرة
- واول ما الدقيق يختفي والخليط يصبح ناعم وقوامه يكون كريمي نوقف خلط علي طول
- اذا كان قوام الخليط سميك يمكن اضافة ملعقة أو اثنان من الحليب الدافئ
- أما إذا كان خفيف يمكن اضافة ملعقة من الدقيق حتي يصبح قوام الخليط ناعم وكريمي
- وهنكون مجهزين صينية الكب كيك من قبل ما نبدأ في عمل الكب كيك وفيها ورق الكاب كيك
- نوزع الخليط فيها بالتساوي، ممكن نستخدم ملعقة الايس كريم او اي معيار متوفر عندنا في البيت
- اهم حاجة خليط الكيك يكون ثلثين القالب فقط، وليس ممتلئا حتي لا يخرج الكيك من القالب أو يصبح مرتفع أكثر من اللازم
- الكمية ديه هتعمل معاكم 16 أو 18 واحدة كب كيك
- ندخلها فرن ساخن مسبقا على درجه حراره 170، نضعها في الرف الاوسط يأخذ من 20 ل 25 دقيقة، ونتأكد انه استوى بعود خشب لو طلع نظيف يبقي استوي لكن لو لسه فيه عجين نتركه 5 دقائق أخري
- نخرجه من الفرن ونتركه يبرد تماما
- ونبدا في تجهيز الكريم شانتيه اللي هنضعه علي الوجه
- في طبق عميق نضع الكريم شانتيه البودر
- وعليه الحليب المثلج
- المكونات كما مدون علي عبوة الكريم شانتيه
- نضيف عليهم الكاكاو الخام حتي نحصل علي اللون المطلوب
- ممكن نحتاج نضيف ملعقة أو اثنان من السكر البودرة حتي نظبط الطعم
- بالمضرب الكهربائى نقوم بخلط المكونات حتي يصبح القوام كريمي ومتماسك جدا
تابعي أيضاً: طريقة عمل حلي بارد بطعم الشوكلاته بدون بيض ولا كريمة ولافرن
- في الوقت ده الكب كيك هيكون برد تماما
- عايزين نقطع جزء من قلب الكب كيك باستخدام ملعقة أو قمع التزين
- وتوسع المكان ده بظهر ملعقة حتي يأخذ كمية معقولة من صوص الشيكولاتة
- صوص الشيكولاته اللي هنستعمله ده زي ما انتم عايزين ممكن نستعمل اي صوص شيكولاته موجود عندنا، او نعمل صوص شيكولاته سريع بالكاكاو، أو نستعمل نوتيلا وطبعا بيبقي طعمها رائع في الكب كيك
- نضع الصوص في كيس الحلواني ونملأ بيه قلب الكب الكيك
- ثم نقفل عليها بالجزء اللي طلعناه في الاول
- ونزين الوجه بالكريم شانتيه مع استخدام أي قمع شكله حلو
- ممكن نعمل وردات صغيرة أو أي إشكال تعجبكم
- وفي الاخر خالص ممكن اضافة صوص شيكولاتة أو شيكولاتة مبشورة او مكسرات مقطعة قطع صغيرة
- او ممكن كمان نتركها سادة خالص هي في كل احوالها بيبقى طعمها تحفه
من اول طعم كيك نفسه بيكون هش وناعم وطعمه حلو جدا
وطعمه يصبح احلي مع الإضافات، مثل صوص الشيكولاتة والكريم شانتيه
كل الحاجات ديه بتدي طعم ومذاق مميز جدا للكب كيك
بعض الملاحظات المهمة لعمل كيك ناجح ⬇️
- عند إضافة الدقيق نقلب بخفة ولا نقلب كثير، بمجرد اختفاء الدقيق نوقف خلط، لان كثرة التقليب تجعل الكيك قاسي وجاف
- درجة حرارة الفرن مهمة جدا 170 بتكون درجة ممتازة لتسوية الكيك
- الفرن يكون ساخن مسبقا قبل دخول الكيك
- لا نتركها فترة طويلة في الفرن حتي لا تصبح جافة
كل الحاجات دي لو اخذنا بالنا منها هيطلع الكيك هش وطري جدا
ولمعرفة تفاصيل اكثر عن الوصفة والمكونات يمكنكم متابعة الفيديو
جربوها هتعجبكم جدا وهتدمنوا طعمها وبالف هنا علي قلوبكم مقدما
[…] تابعي أيضاً: طريقة عمل كب كيك الشوكلاتة بطريقة بسيطة […]