هعمل معاكم النهاردة احلي واطعم صينية البطاطا في الفرن بنكهات هتنقل البطاطا في حتة تانية خالص.
البطاطا طبعا من اكتر الحاجات اللي بنحبها في الشتاء وممكن نعملها بطرق كتير جدا
هنعملها بطريقة حلوة وسهلة وبسيطة ومش هتخذ معاكم وقت في تحضيرها
وهنضيف عليها شوية توابل بسيطة هتودي صينية البطاطا ديه في حتة تانية خالص بتخلي طعمها رائع.
يلا بينا نعملها بس الاول نشوف المكونات اللي هنحتاجها
مكونات صينية البطاطا ⬇️
- 2 كيلو بطاطا
- ربع كوب سكر
- نص ملعقة صغيرة فانيليا
- 2 ملعقة كبيرة ممتلئة قشطة أو ( كريمة لباني او زبدة أو كريمة حلويات )
- رشة بسيطة من ( القرفة – القرنفل – الزنجبيل )
مكونات الكريمة ⬇️
- 2 كوب وربع حليب
- 2 ملعقة كبيرة ممتلئة بشكل هرمي دقيق
- 2 ملعقة ممتلئة زبدة أو سمن
- معلقة أو معلقتين من السكر
- 2 ملعقة كبيرة قشطة أو كريمة لباني او كريم شانتيه
( واختياري اللي حابب يضيف مكسرات او جوز هند وزبيب )
طريقة تحضير صينية البطاطا ⬇️
- نحضر البطاطا ونشويها في الفرن بالطريقة العادية بتاعتنا
- نضعها في صينية او ممكن علي شبكة الفرن او نلفها بفويل وندخلها تشوي في الفرن الاسهل بالنسبة ليكم
- شوي البطاطا في الفرن افضل من سلقها بكتيير حتي نتخلص من السوائل الزيادة الموجودة في البطاطا
- وطعمها كمان وهي مشوية مختلف تماما عن لما بنسلقها بيكون لها مزاق مميز عند الشوي
- نحاول نشيل القشرة براحة وهي ساخنة
- حتي نتمكن من إضافة بقية المكونات عليها وحتي تندمج بسهولة
- وبهراسة البطاطس او بشوكة هنهرسها الاول لوحدها جيدا
- ثم نضيف عليها ربع كوب من السكر
- ونص معلقة صغيرة من الفانيليا
- وشوية من التوابل التي تعطي طعم ومذاق رائع
- القرفة والزنجبيل والقرنفل
- هنضيف منهم رشة بسيطة اوي علي طرف الملعقة منزودش وخصوصا الزنجبيل والقرنفل عشان متمررش
- وجود التوابل ديه بيفرق جدا في طعم البطاطا
- وفي المرحلة ديه ممكن نضيف قشطة أو مكسرات او زبدة اللي انتوا تحبوه والمتوفر عندكم ضيفوه
- نضيف ربع كوب من القشطة بتاعت وش اللبن بتعطي طعم خطير للبطاطا
- وممكن إضافة شوية من عين الجمل وجوز الهند
- ونخلط الكلام ده كله مع بعضه المكونات كلها تندمج مع بعضها
- ونحضر الصينية ندهنها بمسحة خفيفة من الزبدة او السمن
- ونضع فيها خليط البطاطا
- ونحاول نساويها عشان تبقي كلها بسمك واحد
- نخبطها خبطتين كده براحة عشان تبقي متساوية
- نتركها علي جنب قليلا ونجهز الكريمة
تابعي أيضاً: طريقة تحضير أم علي بالطريقة المصرية علي أصولها
تجهيز الكريمة ⬇️
- في طاسة علي نار متوسطة نضع 2 ملعقة كبيرة من الزبدة او السمن نتركهم يسيحوا
- ثم نضيف عليهم 2 ملعقة كبيرة ممتلئة بشكل هرمي من الدقيق
- نقلب الدقيق والزبدة مع بعض علي نار متوسطة حتي يستوي الدقيق ولونه يبقي دهبي خفيف
- و دايما وانتوا بتعملوا البشاميل عشان ميكلكعش منكم خلوا الدقيق سايح في السمن
- ثم نضيف عليهم 2 كوب وربع من الحليب
- وملعقة او ملعقة ونص من السكر
- ونظبط طعم السكر قبل إضافته كله مرة واحده
- لو محتاجة سكر امرها سهل نزود برحتنا لكن لو سكرها جه زيادة مش هنعرف نظبطها
- كمية البشاميل ديه بتبقي مظبوطة وبتعملي طبقة خفيفة علي الوش عايزين كريمة اكتر زودوا المكونات
- كل ملعقة دقيق ممتلئة عليها ملعقة زبدة كبيرة ممتلئة وكوب حليب + 2 ملعقة كبيرة ممتلئة حليب
- نخلط حتي يصبح القوام اتقل وتبدأ في الغليان واول ما تغلي نقفل عليها علي طول
- وآخر حاجة نضيفها نص ملعقة صغيرة من الفانيليا
- قوام الكريمة المظبوط بيكون ناعم وكريمي وسمكه متوسط ولا يوجد بها أي كتل
- نضيفها علي طول علي وش البطاطا
- ونحتفظ بربع كوب فقط من الكريمة نضيف عليه معلقة كبيرة من القشطة
- نقلبها معاهم جيدا هي هتسيح من سخونية الكريمة مباشره
- ونرجع نوزعهم علي الوش كله
- معلقة القشطة ديه بتدي طعم حلو وهتدي كمان الوش لون حلو
- ندخلها فرن ساخن علي درجة حرارة متوسطة من 10 دقائق ل 15 دقيقة
- هي كل حاجة فيها مستوية
- محتاجين بس المكونات تسخن كلها مع بعضها
- واول ما نلاقيها عملت فقاعات كده من الجوانب او المنتصف نقفل عليها علي طول
- ونفتح الشواية تخد اللون الذهبي الحلو
- نطلعها ونقدمها وهي ساخنة لكن نتركها تهدا بس 10 دقائق حتي نتمكن من تقطيعها
- وفي الاخر خالص قبل التقديم مباشرة ممكن نضع علي الوش شوية من صوص الكراميل
- وخصوصا لو السكر في البطاطا كان مظبوط أو قليل فصوص الكريم كراميل بيظبط الطعم جدا
وصفة لذيذة جدا وسهلة ولا تأخذ وقت في تحضيرها
ولمعرفة اي معلومات اكثر عن الوصفة والمكونات يمكنكم متابعة الفيديو
جربوها هتعجبكم جدا وبالف هنا علي قلوبكم مقدما
التعليقات مغلقة.