الذ واسرع طبق مكرونة بالتونة | باستا بالتونة وصوص الطماطم بطعم رائع

134

لما نبقي محتارين ومش عارفين نعمل اكل ايه، وفي نفس الوقت مش عايزين نقف في المطبخ كثير، ومحتاجين اكلة تنجز معانا،  مكرونة بالتونة هي اول اختيار بيجي في بالنا.

ده بسبب أن طريقة عمل مكرونة بالتونة تحضيرها سهل جداً، ولأن كمان مكوناتها بسيطة وطعمها بيكون لذيذ جدا، ولأنها أيضا من الاكلات المحببة لكل أفراد الأسرة.

هعملها معاكم النهارده بطريقه حلوه جدا، مخدتش وقت خالص في تحضيرها وكمان مكوناتها بسيطة، طعمها بيطلع رائع.

وممكن كمان نزود عليها شويه خضار ورشه من الجبنه ونحولها لطاجن مكرونه طعمه فظيع.

يلا بينا نبتدي في شرح الوصفة بس الاول نشوف المكونات اللي هنحتاجها

طبق مكرونة بالتونة

مكونات طبق مكرونة بالتونة

  • نص كيلو مكرونة
  • علبة تونة
  • 2 كوب عصير طماطم مركز
  • ملعقة كبيرة ممتلئة معجون الطماطم
  • بصلة متوسطة
  • 4 أو 5 فصوص ثوم
  • نص ملعقة صغيرة سكر
  • التوابل (ملعقة صغيرة من الملح – ونص ملعقة صغيرة فلفل اسود – ملعقة صغيرة زعتر أو ريحان – ربع ملعقة صغيرة بذور الفلفل الحار )
  • زيت زيتون
  • فلفل اخضر او الوان مقطع شرائح رفيعة
  • زيتون اسود واخضر مقطع شرائح متوسطة
  • فلفل حار اختياري مقطع صغير جدا
  • جبنة شيدر مبشورة او موتزريلا مبشورة او ممكن نستعمل من الاثنين

طريقة تحضير طبق مكرونة بالتونة ⬇️

  • اول حاجه هنعملها هنسلق المكرونه
  • حلة على النار فيها ميه بتغلي، هنضيف عليها ملعقه كبيره ممتلئة من الملح، عايزين نملح المكرونه كويس قوي ومش هنضيف زيت ولا اي حاجه تانية هو الملح فقط
  •  ونضع فيها اي نوع او اي شكل تفضلوا من المكرونة، نقلبها تقلبتين بس وهنسيبها تستوي
  • الافضل في تسوية المكرونة نقلل عن الوقت اللي مكتوب علي العبؤة دقيقه او دقيقتين، اول ما تغلي نتركها 6 أو 7 دقائق علي الاكثر، كل ما كانت المكرونه بتشد شويه طعمها بيطلع احلى بكثير من أننا نسويها تسوية كاملة

وفي الوقت اللي بتتسلق في المكرونه هنجهز الصلصه، نقوم بتسوية المكرونة وصوص الطماطم في نفس الوقت

طريقة تحضير صوص الطماطم بالتونة ⬇️

  • اناء علي النار، نضع فيها 3 أو 4 ملاعق كبيرة ممتلئة من زيت الزيتون
  • ثم نضيف بصلة صغيره مفرومة فرم خشن
  • وثلاث او اربع فصوص من الثوم أيضا مفرومين فرم خشن
  • نشوحهم تشويحه بسيطة اوي ريحة الثوم بس تطلع
  • ونضيف عليهم علبة من التونه، هنصفيها من الزيت او محلول الملح اللي فيها بس نحتفظ بجزء بسيط من المحلول يعطي نكهة ومذاق طيب للصوص
  •  نقلبها تقلبتين في الزيت مع البصل والثوم تاخذ لسعه بسيطة
  • ثم نضيف عليها 2 كوب من عصير الطماطم المركز
  • وملعقة كبيرة ممتلئة من معجون الطماطم
  •  ونصف ملعقه صغيرة  من السكر
  •  ثم نضيف التوابل (ملعقة صغيرة من الملح، ونصف معلقه صغيره من الفلفل الاسمر، ومعلقة كبيرة من الزعتر او الريحان لإعطاء رائحة ومذاق طيب، وربع ملعقة صغيرة من بذور الفلفل الحار او الشطة تعطي طعم خفيف
  •  ثم نقوم بخلط كل المكونات مع بعضه، ونضبط طعم الملح
  • ونتركها تغلي لمدة ثواني فقط حتي تندمج المكونات المكونات كلها مع بعضها وصلصة الطماطم تكمل تسوية
  • المكرونة هتكون استوت، نضعها علي صوص الطماطم بالتونة ونحتفظ بنصف كوب من ماء سلق المكرونة الذي يعطي لصوص الطماطم قوام مظبوط
  • نقلب المكرونة مع صوص الطماطم تقلبتين ثم نضيف ماء السلق تدريجيا مع التقليب حتي نحصل علي قوام صوص مظبوط، وكل المكونات تندمج وتسخن مع بعضها
  • نقدمها وهي ساخنة، ومن الأفضل وضع المكرونة في صوص الطماطم وقت التقديم حتي نحصل علي طعم افضل المكرونة
  • نضع عليها رشة من البقدونس وتقدم وهي ساخنة.

تابعي من هنا: طريقة عمل فطيرة البطاطس بالتونة

طريقة تحضير طاجن المكرونة بالخضار ⬇️

  • نكمل تسوية المكرونة كما سبق
  • ثم نضعها وهي ساخنة في طاجن فخار أو طبق عميق يدخل الفرن
  • ونصف عليها زيتون اخضر واسود مقطع شرائح
  • فلفل رومي اخضر او الوان مقطع شرائح رفيعة
  • فلفل حار مقطع صغير ( اختياري)
  • نخلطهم مع بعض
  • ونضع علي الوجه جبن موتزريلا أو شيدر مبشورة
  • ندخلها فرن ساخن مسبقا في الرف الاوسط
  • نتركها من 5 دقائق الي 10 دقائق المكونات كلها تندمج وتسخن مع بعضها، والجبن يسيح ويخد لون ذهبي خفيف
  • نطلعها من الفرن وتقدم وهي ساخنة

المكرونة في الحالتين طعمها بيكون رائع، بصوص الطماطم والتونة فقط، او بالخضار الفلفل والزيتون والجبن، طعمها في كلتا الحالتين لذيذ جدا

طريقتها بسيطة ومكوناتها تقريبا متوفرة في كل بيت، وفي أو وقت مستعجلين ومحتاجين اكل سريع لا يأخذ وقت في تحضيره، المكرونة بالطريقة ديه هتنجز معاكم جدا

جربوها متاكده انها هتعجبكم جدا وبالف هناء على قلوبكم مقدما

لمعرفة تفاصيل اكثر عن الوصفة والمكونات يمكنكم متابعة الفيديو في الاسفل

بالهنا والشفا

0/5 (0 Reviews)

التعليقات مغلقة.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبول قراءة المزيد