هعمل معاكم النهاردة كرات البطاطس الشهية المقرمشه بطريقة سهلة وسريعة جدا، وبمكونات بسيطة ومتوفرة في كل بيت، طعمها بيطلع رائع مقرمشة من بره ومن جوه طرية ولذيذة جدا، الحشوة كمان طعمها بيكون حلو اوي.
وهنشوف ازاي نعملها من غير ماتفك مننا في الزيت وتبقي كرسبي ومقرمشة
يلا بينا نشوف طريقة تحضيرها بس الاول نشوف المكونات اللي هنحتاجها
المكونات
- كيلو بطاطس
- 2 ملعقة كبيرة دقيق
- 2 ملعقة كبيرة نشا
- نص كوب بقدونس
- ملح فلفل بابريكا ثوم بودر بصل بودر
واللي حابب يعرف اكثر عن الوصفة وطريقه التحضير يمكنكم متابعة الفيديو 👇
طريقة سلق البطاطس⬇️
- نغسل البطاطس جيدا
- ثم نضعها بقشرها كما هي في حلة عميقة
- نضع عليها ماء ساخن وملعقة صغيرة من الملح
- نرفعها علي النار، ونتركها تستوي تماما
تحضير الحشوة ⬇️
- هنحتاج فلفل الوان ربع واحدة من كل نوع، ممكن طبعا استعملوا نوع واحد فقط، ونقطعهم لمكعبات صغيرة جدا
- وشوية من الزيتون الاخضر او الاسود، ونقطعه أيضا قطع صغيرة
- ونص واحدة من البصل الاخضر، ولو مش متوفر ممكن نستعمل بصل عادي، البصل بيعطي مع الحشوة طعم ومزاق مميز
- ونضيف عليهم روزبيف او بسطرمة مقطعين قطع صغيرة جدا
- ونضيف ايضا شوية من الجبنة الشيدر اوالجبنة الموتزاريلا أو نوع واحد فقط منهم
- ونتبلهم بربع ملعقة صغيرة من الملح والفلفل والثوم البودرة والبصل البودرة والزعتر والبابريكا
- وفي حالة إضافة البسطرمة نستغنا عن الملح
- نخلط كل المكونات مع بعضها جيدا ونتركها جانبا
- و ممكن نغير الحشوة ونعملها بالجبن الشيدر او الموزريلا فقط
طريقة تحضير البطاطس بعد سلقها ⬇️
- البطاطس خلاص استوت نصفيها من ميتها تماما ونتركها تهدأ قليلا ثم نقشرها
- ثم نهرسها بالشوكة او بهراسة البطاطس
- او ممكن نستخدم في هرسها المصفاة السلك، البطاطس بطريقة المصفاة السلك بتكون ناعمة ومفيهمش اي كتل تماما
- ثم نضيف عليها 2 ملعقة كبيرة ممتلئة من النشا
- و2 ملعقة كبيرة ممتلئة من الدقيق
- ونصف حزمة من البقدونس، ناخذ الورق فقط ونقطعه ناعم جدا
- ثم نضيف عليهم شويه توابل بسيطة ملعقة صغيرة من كل حاجة ( ملح – فلفل – بابريكا – ثوم بودر – بصل بودر، ونصف ملعقه من الفلفل اسود )
- نخلط كل المكونات مع بعضها البعض جيدا، ونظبط الطعم لو محتاجة شويه ملح او اي حاجه من التوابل نضيفها
- ثم نعجن المكونات كلها حتي تصبح مثل العجينة، وبتلزق بسيط في اليدين
- مع مراعاة عدم المبالغة في كمية النشا والدقيق، بمعني مش كل ما نلاقيها انها بتلزق او طريه نزود نشا ونزود دقيق، هنلاقيها نشفت معانا واصبحت قاسية، الملعقتين اللي ضفناهم من النشا والدقيق كفاية جدا أنهم يمسكوا المكونات كلها مع بعض، ويمتصوا اي سوائل
كده خلاص البطاطس بقت جاهزه معانا والحشوة كمان أصبحت جاهزة، نبتدي في حشو البطاطس
تابعي أيضاً: طريقة عمل البطاطس المقرمشة في الفرن
طريقة عمل كرات البطاطس ⬇️
- نأخد قطعة صغيرة من البطاطس ونفردها بسيط ونضع فيها كمية صغيرة من الحشوة
- ثم نقفلها كويس جدا علي الحشوة
- وبلاش نضع كمية كبيرة من الحشوة عشان البطاطس ما تفتحش والحشوة تخرج منها وقت القلي
- واهم خطوة أننا نقفل البطاطس كويس جدا علي الحشوة، ونلفها بين ايدينا عشان تاخذ الشكل الدائري الحلو، وفي نفس الوقت عشان نتاكد ان مفيش اي فتحات الحشوة تخرج منها
- نضعها على صينيه مفرود عليها ورق زبده او بلاستيك ونترك مسافة بين كل واحدة والاخري حتي لا تلتصق ببعضها
- وندخلها الفريزر ربع ساعة تتماسك شوية
تغطية كرات البطاطس بالبيض والبقسماط ⬇️
- في طبق عميق نضع 2 حبة بيض وعليهم رشة بسيطة من الملح والفلفل
- وفي طبق اخر نضع كورن فليكس مطحون طحن خشن، الكورن فليكس مع كرات البطاطس بيكون كرسبي ومقرمش وفي نفس الوقت لا يمتص الزيت
- لو الكورن فليكس غير متوفر ممكن نستخدم البقسماط الكرسبي او البقسماط الناعم
- نخرج كرات البطاطس من الفريزر
- نضعها الاول في البيض نغطيه بيه كويس
- ثم نضعها في البقسماط ونغلفها بيه كويس جدا
- ممكن لو عندكم بعض من الوقت نضعها في الفريزر مرة أخري لمدة عشر دقائق فقط تتماسك شوية
- لكن لو مستعجلين ممكن نقليها علي طول
طريقة تسوية كرات البطاطس ⬇️
- نخرجها من الفريزر، ونضعها في زيت غزير على نار عالية
- الزيت يكون سخن، ونضع كمية قليلة من كرات البطاطس، حتي لا يبرد الزيت وتفك مننا
- البطاطس بتاخذ لون على طول ثواني وبتلاقوها اتحمرت، مش بنخليها في الزيت كتير عشان متفكش، اول ما نلاقيها خدت اللون الذهبي الحلو بنطلعها علي طول
- البطاطس كل حاجة فيها مستوية فمش هتاخذ وقت في التحمير، نقليها قبل التقديم علي طول
- نطلعها علي مصفاة أو شبكة، وبلاش مناديل عشان المناديل بتطري البطاطس
ملحوظة ⬇️
- في حالة انكم عايزين تحتفظوا بجزء منها في الفريزر تستخدميه في اي وقت تاني
- بعد ما نعملها بالبيض والبقسماط نضعهم في صينية ونضعهم بعيد عن بعض
- ندخلهم الفريزر ونتركهم الي أن يتجمدوا تماما
- وبعد كده ممكن نحفظهم في اكياس أو علب فريزر من غير ما نقلق أنهم ممكن يلزقوا في بعض
- ونخرجها من الفريزر ونسيبها تهدأ شوية وبعدين ننزلها في الزيت علي طول
- وقت القلي لا نضع كمية كبيرة من كرات البطاطس حتي لا تفك
- الزيت يكون ساخن
- نعملها قبل التقديم مباشرة
نضعها في طبق التقديم مع أي صوص بتحبوا طعمه
لمعرفة تفاصيل اكثر عن الوصفة والمكونات يمكنكم متابعة الفيديو
وبالف هنأ علي قلوبكم مقدما
التعليقات مغلقة.