مطبخ جيهان عزب لكل محبي الطهي والوصفات الشهية

طريقة عمل كفتة الحاتي زي المحلات بكل أسرارها سهلة وبسيطة ومشوية في الفرن

2٬897

هعمل معاكم النهاردة احلي وأطعم واطري كفتة مشوية في الفرن, كفتة الحاتي زي المحلات اللي احلي من المحلات هنعملها مع بعض في البيت، هتعرف كل أسرارها اللي تخليها معانا طرية وهشة ومتكشش بعد التسوية

وهنشوف كمان التسوية المظبوطة وازاي اللي تطلع طرية وبتقطم  مش ناشفة وبتشد وعاملة زي الكاوتش

طريقة عمل كفتة الحاتي

يلا نبتدي في عمايلها علي طول بس الاول نشوف المكونات اللي هنحتاجها

مكونات عمل كفتة الحاتي زي المحلات ⬇️

  • كيلو لحمة مفرومة
  • خليط من اللحم البقري واللحم الضاني ((أو ممكن 3/4 لحم بقري والربع لية خروف ))
  • 2 بصلة متوسطة الحجم
  • رغيف فينو الحجم الصغير
  • ربع كوب بقدونس مفروم الورق فقط
  • ملعقة كبيرة بيكنج بودر
  • ملح وفلفل

سلطة الطحينة ⬇️

  • كوب طحينة خام
  • ملعقة صغيرة ثوم مفروم ناعم
  • عصير ليمونة كبيرة
  • 2 ملعقة كبيرة خل
  • ملح – كمون – بابريكا – شطة اختياري

طريقة تحضير عجينة كفتة الحاتي زي المحلات ⬇️

  • معايا كيلو من اللحمة المفرومة
  • يفضل نعمل الكفتة بخليط من اللحمة البقري واللحم الضاني
  • في حالة عدم تواجد لحمة ضاني نضيف لية خروف
  • نضع منها من 20 ل 25 في المائة من نسبة اللحم المفروم
  •  ليه الخروف بتعطي الكفتة طعم ومذاق رائع
  • يعني كيلو اللحمة بيبقي تلت تربع لحم والربع الباقي بيبقي لية الخروف
  • نفرم اللحم الطازج مع قطع اللية
  • كل ما كانت اللحمة طازة بيبقي طعم الكفتة
  • في الطبق اللي هنجمع فيه كل المكونات
  • نضيف اللحم واللية بعد فرمهم مع بعض
  • نتركهم جانبا ونحضر باقي المكونات اللي هنحتاجها
  • نحضر رغيف من العيش الفينو الحجم الصغير
  • نقطعه صغير ونضيف عليه ربع او نص كوب من الحليب الدافئ
  • ونتركهم خمس أو عشر دقائق منقوع في الحليب حتي يطري الفينو تماما
  • الفينو ده بيخلي الكفتة هشة وطرية وبديل البقسماط أو الدقيق اللي بنضيفهم عشان نمسك بيهم مكونات الكفتة وتبقي طرية

تابعي أيضاً: طريقة عمل كفتة البطاطس المقرمشة

  • الفينو ايضا بيجعلها طرية وفي نفس الوقت بيعطيها طعم حلو اوي
  • ثم نصفيها جيدا من الحليب ممكن بمصفاة أو باايدينا نعصرها جيدا للتخلص من اي حليب زيادة
  • ونضيفها علي طبق اللحم المفروم
  • تاني حاجة هنستعملها البصل
  • كيلو اللحمة بيخد 2 بصلة متوسطة الحجم أو بصلة واحدة كبيرة
  • نبشرهم ناعم أو ممكن تعملوها في محضرة الطعام
  • من الحاجات اللي بتخلي الكفتة تكش البصل لو كتير وضيفنه بميته بيخلي حجم الكفتة كبير وهو نئ وبعد التسوية نلاقيها نزلت ميه كتير وكشت
  • افضل حاجة نصفيها من ميتها
  • نضيف عليها ملعقة صغيرة من الملح تساعدها أنها تنزل ميتها وتمنع تغير ريحتها
  • نتركه 5 دقائق ثم نصفيها ونضيفه علي اللحم
  • ونحتفظ بماء عصير البصل هنستعمله لاحقا
  • ونضيف عليهم ربع كوب من البقدونس نأخذ الورق بس ونفرمه ناعم
  • منزودش من البقدونس اوي عشان ميغمقش الكفتة
  • وهنتبل الكفتة بملعقة كبيرة ممسوحه من الملح عشان ضيفنا ملح علي البصل
  • ومعلقة كبيرة من الفلفل الاسود
  • ومعلقة كبيرة من البيكنج بودر، بيخليها هشة من جوه ومتبقش مكبوسة أو مكتومة
  • وبس كده مش هنضيف  اي توابل تاني عليها تغير من طعمها
  • ثم نعجن كل المكونات مع بعضها جيدا با أيدينا اوفي محضرة الطعام
  • والخطوة ديه مهمة جدا عشان الكفتة تبقي متماسكة ومتقعش من علي السيخ واحنا بنسويها
  • هنعجن لحد ما نلاقي أنسجة اللحم بقت متماسكة ومتشابكة جوه بعضها
  • من الحاجات اللي تخلي الكفتة تقع من إلسيخ ايضا أنها متعجنتش كويس اوي
  • او انكم حطيتوا مكونات كتير فيها ميه مثل البقدونس والفلفل والبصل
  • الكفتة من العجن بتسخن ومش هنعرف نشكلها
  • هنغطيها وندخلها الثلاجة نص ساعة أو ساعة تريح وتتماسك شوية وتصبح متماسكة مش بتلزق

تحضير ماء البصل⬇️

  • نأخذ ماء البصل ونضيف عليها بشر حبة طماطم متوسطة الحجم، نبشرها ناعم
  • أو ممكن بديل الطماطم ملعقة صغيرة من صلصة الطماطم
  • و2 ملعقة كبيرة من الزيت
  • وربع ملعقة صغيرة من الفلفل الاسود
  • وهي فيها ملح مش هنضيف تاني
  •  أو ممكن اضافة ربع ملعقة صغيرة لو حسيتوا أنها محتاجة ملح
  • نخلطهم  مع بعض جيدا ونتركها جانبا حتي نشكل الكفتة وتستخدمها في مسح وش الكفتة

طريقة تشكيل اصابع كفتة الحاتي زي المحلات ⬇️

الكفتة خلاص اتشمعت ومبقتش بتلزق في الايد، نبدأ في تشكيلها

  • في حالة سويها علي الفحم نشكلها علي الاسياخ بتاعتها ونضعها علي شبكة فوق الفحم
  • في حالة التسوية في الفرن، نشكلها علي عيدان الشيش
  •  بس الاول انقعوها شوية في المية عشان متتحرقش في الفرن
  • هنخذ قطعة من الكفتة ونعجنها باايدينا الاول وبعدين نشكلها علي العيدان الخشب
  • وفي الاخر خالص نمسح وش الكفتة بمية البصل ونصبعها
  • نستعمل أكثر عود من عيدان الشيش عشان تعمل فجوة أو فراغ من الداخل يساعد علي تسوية الكفتة بسرعة
  • لو هنسويها من غير العيدان، نمسح عيدان الخشب الاول بمسحة خفيفة من الزيت عشان يبقي سهل اشيله منها
  • لكن في حالة تسويتها علي العيدان الخشب، نقفل الطرفين من فوق ومن تحت جيدا عشان تبقي متماسكة ومتقعش وقت التسوية
  • ممكن أيضا تعملوها علي عيدان صغيرة بيبقي حجمها صغير وبتبقي حلوة جدا
  • أو تعملوها علي ايد معلقة خشب بس الاول تمسوحها بالزيت عشان تطلع منها بسهولة

طريقة تسوية اصابع الكفته ⬇️

التسوية وديه اهم من عمل الكفتة نفسها

  •  نسويها علي شبكة حتي تكون بعيدة عن اي سوائل أو دهون تنزل منها
  • نقوم برص اصابع الكفته علي الشبكة
  • ثم ندخلها فرن ساخن مسبقا علي اعلي درجة حرارة
  • وقت تسوية الكفتة مش اكثر من 10 دقائق
  •  الفرن بيكون ساخن جدا، يعطي صدمة للكفتة أول ما تدخل
  •  وده بيحافظ علي الكفتة انها تحتفظ بالسوائل داخلها  ميتها وديه من الحاجات اللي بتخلي الكفتة طرية
  • ممكن نضعها في الفرن اول 6 دقائق تتشمع وتدخل في التسوية
  • ثم نفتح عليها الشواية تأخذ لون خفيف من كل جهة
  • لا نترك الكفتة في الفرن وقت طويل تتحمر ستصبح جافة وبتشد مش طرية
  • اول ما تأخذ لون خفيف نخرجها من الفرن مباشرة

كيفية إعطاء ريحة الشوي للكفتة ⬇️

  • ممكن لو عايزين نديها ريحة الفحم
  • نسخن فحمة جيدا حتي تحمر
  • ونقوم بوضع كل كمية الكفتة في صينية أو حلة كبيرة
  • ونضع الفحمة في ورقة فويل أو طبق صغير في وسط الكفتة
  •  ونضيف عليها نقطتين من السمن او الزيت
  •  نغطيها جيدا ونتركها تأخذ من ريحة الفحم ونرفع عنها الغطاء بعد مرور 10 دقائق أو أكثر
  • نقدمها وهي ساخنة مع رز او مع عيش وسلطة طحينة ودوقوا احلي كفتة طرية وهش

طريقة عمل سلطة الطحينة ⬇️

  • في طبق عميق نضع كوب من الطحينة الخام
  • نيف عليه عصير ليمونة كبيرة
  • و2 ملعقة كبيرة ممتلئة من الخل
  • و3 أو 4 فصوص من الثوم فرمتهم ناعم
  • ونص ملعقة صغيرة من الملح والكمون والبابريكا
  • اختياري ممكن اضافة الفلفل الاحمر الحار
  • هنحتاج كوب من الماء نضيف منه تدريجيا مع التقليب
  • نزو شوية بشوية ونقلب منزودش ميه كتير مرة واحدة عشان منلقهش بقت خفيفة أوي
  • احنا بنزود شوية ونقلب ونشوف القوام
  • لحد ما نوصل للقوام الطحينة المطلوب قوام متوسط مش خفيف ولا سميك، وبيكون ناعم ومفيهش اي كتل
  •  الطحينة كل ما تقعد يصبح قوامها سميك، يعني يفضل نعملها قبل التقديم مباشرة، أو ممكن عملها ووضعها في الثلاجة ووقت التقديم نقلبها ونضيف قليل من الماء حتي يصبح القوام مظبوط
  • قدموها مع أي مشويات طعمها بيكون رائع

تقدم الكفتة وهي ساخنة مع الارز او مع عيش وسلطة الطحينة اللي عملناه

ودوقوا احلي كفتة طرية وهشة وطعمها رائع واحلي من كفتة الحاتي

 

لمعرفة تفاصيل اكثر عن الوصفة والمكونات يمكنكم متابعة الفيديو

جربوها وبالف هنأ علي قلوبكم مقدما

بالهنا والشفا

التعليقات مغلقة.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبول قراءة المزيد