النهاردة هنتعلم مع بعض طريقة عمل الارز المعمر الفلاحي بألذ وأطعم طريقة، وده من الوصفات اللي لازم تتعمل صح وعلي أصولها، عشان يطلع معانا كريمي والرز مفلفل والوش طري وواخد لون حلو.
وعشان يبقي بالشكل ده لازم نظبطه، نحطله حليب كامل الدسم، قشطة، سمن، عشان يطلع معانا الارز المعمر الفلاحي علي أصوله.
تعالوا نشوف مع بعض المكونات اللي هنستعملها
مكونات عمل الارز المعمر الفلاحي
- 2 ونصف كوب ارز
- 5 كوب حليب
- ملعقة كبيرة ملح
- ملعقة صغيرة سكر
- قشطة
- سمن
- كوب زبادي
– قبل مانبتدي نشغل الفرن علي اعلي درجة
تابعي من هنا: طريقة عمل كفتة الارز المصرية
طريقة عمل الارز المعمر الفلاحي
- نجهز القالب أو الصينية ندهنها بمعلقة كبيرة من السمن
- نراعي أن يكون ارتفاع القالب عالي حتي لا يحدث فوران للبن عند الغليان
- نغسل الرز كويس وننقعه من نص ساعة لساعة الا ربع، والخطوة ديه مهمة عشان بتخلي الرز مفلفل
- نغلي الحليب ويفضل يكون حليب طبيعي كامل الدسم كل كوب رز بتخد 2 كوب حليب مغلي ( بس هنقلل منها ربع كوب عشان الرز منقوع )
- نضع عليها ملعقة كبيرة ملح وملعقة صغيرة سكر ونقلبه كويس
- لا نضع اي توابل أخري علي الرز المعمر. ولا فلفل اسود ولا اي توابل أخري
- نصفي الرز من ميته ونضعه في الطاجن
- بنضيف لكل كوب رز ملعقة كبيرة من السمن البلدي ونقلب السمن مع الرز جيدا، عايزين كل حبيبات الرز تتغلف بالسمن
- نضع علي الارز الحليب المغلي ونقلب براحة الرز مع الحليب
- في نفس الوقت هنقلب 3 ملاعق كبيرة من القشطة البلدي، مع كوب الزبادي الي أن يصبح القوام كريمي وناعم
- نغطي الوش كله بخليط الزبادي والقشطة عشان الزبادي يجعل الوش كريمي جدا والرز طري مش ناشف، والقشطة بتدي طعم حلو جدا للرز وبتدي لون ذهبي حلو عند تحمير الوجه
طريقة تسوية الارز المعمر
نيجي بقي للتسوية وديه أهم خطوة في الموضوع كله
- الفرن يكون ساخن جيدا
- قبل دخول الطاجن أو الصينية الفرن، هنقفل الفرن ونفتح الشواية
- نضع الطاجن في الفرن في الرف الاوسط ونتركه حتي ياخذ الوجه لون ذهبي حلو
- ثم نطفي الشواية ونرجع نشغل الفرن علي درجة حرارة متوسطة أو اقل من المتوسط بشوية ( درجة حرارة هادئة ) ونضع الطاجن في الرف الأقرب للنار
- نتركه حتي يتم تسويته ويقدم وهو ساخن
ممكن وضع لحمة متقطعة مكعبات ومسلوقة أو دجاج مسلوق مقطع لقطع متوسطة ، ونضعهم في منتصف الارز لإعطاء الطبق طعم ومذاق مميز
طبق لذيذ جدا ويشرفك في اي عزومة أو في أي وقت علي سفرتك جربوه هيعجبكم جدا وبالف هنا علي قلوبكم مقدما
اتفرجي علي الفيديو ده عشان تشوفي الطريقة كاملة
التعليقات مغلقة.