هعمل معاكم انهاردة وصفة معجنات هتعجبكم جدا, وهي فطيرة البيتزا السريعة أو اللي بنسميها فطيرة الشمس ومكوناتها بسيطه تنفع في فطار او غداء او عشاء مناسبه لاي وقت نحب نعملها فيه
يلا بينا نبتدي في شرح الوصفة بس الاول نشوف المكونات اللي هنحتاجها
مكونات فطيرة البيتزا السريعة
- كوب الاربع حليب دافئ بحرارة الغرفة
- ملعقة كبيرة خميرة
- ملعقة كبيرة سكر
- 3 ملعقة كبيرة ممتلئة زيت زيتون او زيت نباتي
- بيضة بحرارة الغرفة
- ملعقة صغيرة زعتر
- 2 كوب دقيق
- ملعقة صغيرة ملح
- كاتشاب أو صلصة بيتزا
طريقة تحضير العجينة ⬇️
- في طبق عميق نضع كوب الا ربع من الحليب الدافي
- نضع عليه ملعقة كبيرة من الخميرة
- وملعقة صغيرة من السكر
- نضيف عليهم ثلاث ملاعق كبيرة ممتلئة من زيت الزيتون لو غير متوفر ممكن نستخدم زيت نباتي عادي
- وملعقة صغيرة من الزعتر الطازج أو المجفف
- ثم نضيف عليهم بيضة واحدة فقط بدرجه حرارة الغرفة، نأخذ منها البياض فقط نضعه علي باقي المكونات، والصفار نحتفظ بيه هنستعمله بعدين
- نخلط كل المكونات مع بعض جيدا، نعطيهم لمدة 5 دقائق الخميرة تتفاعل ونتأكد أنها شغالة كويس
- ثم نضع ملعقة صغيرة من الملح على 2 كوب من الدقيق، ونخلطهم مع بعض جيدا
- ثم نضيفه علي خليط الخميرة شوية بشوية مع التقليب، ولا نضيفه مرة واحدة، ممكن نخذ كمية الدقيق كلها أو أكثر أو أقل لان كل دقيق يختلف عن التاني
- نخلط حتي تنتهي كل كمية الدقيق ويختفي تماما
- نضع علي اي سطح رشة خفيفة من الدقيق، ثم نضع عليها العجينة ونعجنها باليد مدة لاتقل عن 5 دقائق
- وممكن طبعا لو العجان متوفر نستخدم من 4 ل 5 دقائق
- نعجن حتي تلم العجينة كلها، وتتكون عجينة طرية وناعمة الملمس ومتماسكة قليلا، لكن في نفس الوقت بتلزق في اليد بسيط
- العجينة المظبوطة تكون طرية وناعمة، وليس ناشفة وقاسية، لا نضيف دقيق زيادة عن اللزوم حتي لا تصبح العجينة قاسية
- ثم نضعها في طبق عميق ممسوح خفيف بالزيت، نغطيها ونتركها في مكان دافئ حتي تخمر ويتضاعف حجمها
- بعد مرور ساعة من الوقت خمرت جيدا وتضاعف حجمها
- نخرج منها الهواء ونستعملها
طريقة تحضير فطيرة البيتزا السريعة ⬇️
- ممكن نضعها في صينية مدهونة جيدا بالزيت أو عليها ورق زبدة ونمسح وش الورق بالزيت حتي لا يلتصق بالعجينة، ونضع بها العجينة ونفردها في نفس الصينية
- او نفردها علي اي سطح خارجي بالنشابة بس الاول نرش علي النشابة رشة خفيفة من الدقيق، ثم نرفعها بعد ذلك ونضعها في الصينية
- نستخدم صينية مناسبة لحجم العجينة بحيث يكون سمكها مظبوط ليس سميك ولا رفيعة، ممكن نستخدم صينية مقاس 30
- ثم نضع طبق صغير في وسط الصينية
- ونحضر 2 ملعقة كبيرة ممتلئة من صلصة البيتزا او ممكن نستعمل صلصة عادية ونضيف عليهم نصف معلقه صغيره من الثوم البودر والزعتر والملح والفلفل، لو الصلصة ثقيلة ممكن نخففها بشوية من الماء حتي يصبح قوامها مظبوط
- ونقوم بفرد الصلصة علي الجزء الباقي من حول الطبق
- ثم نضيف فوق الصلصة شوية من الجبنة الشيدر المبشورة أو الموزريلا
- وعليهم نضع زيتون اخضر او اسود مقطع شرائح
- واي شوية خضار فلفل الالوان احمر او اخضر او اصفر
- وممكن إضافة بسطرمة أو سلامي أو تونة أو سوسيس أو روزبيف، نقطعهم قطع صغيرة ونضعها علي الوجه
- ممكن اضافة اي حاجة بتحبوا طعمها
تابعي أيضاً: طريقة عمل خلية النحل بعجينة زي القطن هشة وطرية جداً
- ممكن نضع لحمة مفرومة نشوحها مع بصلة ونسويها ولما تبرد تماما نضعها عليها
- او ممكن نعملها بالدجاج، نعمله فاهيتا أو شاورما أو أي طريقة تعجبكم نسويه الاول جيدا ونتركه حتي يبرد تماما
- الفطيرة ديه اي حشوة تنفع معاها، علي حسب احنا عايزينها للفطار أو الغذاء أو العشاء نحدد نوع الحشوة
- اهم حاجه اي حشوة مستوية على النار نسيبها الي أن تهدأ تماما
- واخر حاجة نضع علي الوجه شوية من الجبن الشيدر او الموزريلا
- نرفع الطبق من الصينية
- وتقسم الجزء اللي في المنتصف بالسكين الي 4 اجزاء
- وكل جزء منهم نقسمه الي اثنان أو ثلاثة
- يصبح الجزء اللي في المنتصف علي شكل مثلثات
- ناخذ كل مثلث منهم ونرفعه علي الحشوة، بحيث يوصل لطرف العجينة ونضغط عليهم كويس جدا بحيث يلتصقوا مع بعض
- نكمل بنفس الطريقة مع باقي المثلثات
- نحضر صفار البيضة ونضع عليها ملعقة من الحليب ورشة من الملح والفلفل الاسود، نقلبهم جيدا
- ثم ندهن بيهم وجه المثلثات فقط
- ونرش عليهم رشة من السمسم أو حبة البركة
طريقة التسوية⬇️
- ندخل الصينية فرن ساخن مسبقا علي درجة 170 نضعها في الرف الاوسط
- من 25 ل 30 دقيقة
- او لحد ما نلاقيها اخذت لون ذهبي من أسفل ومن الجوانب نطفي الفرن ونفتح عليها الشواية
- ونتركها حتي تأخذ لون ذهبي حلو من علي الوجه
- نخرجها من الفرن ونقطعها وتقدم وهي ساخنة
- نقدمها مع كاتشب أو صوص باربكيو أو سلطة زبادي
الفطيرة من وهي بتستوي في الفرن ريحتها حلوة جدا هشه وطريه وخفيفة جدا مش مكتومة ولا مكبوسة، وطعمها كمان اكثر من رائع اي حشوه هنحطها مع العجينه دي بيبقى طعمها حلو جدا
ولمعرفة تفاصيل اكثر عن الوصفة والمكونات يمكنكم متابعة الفيديو
اتمنى تجربوها وتعجبكم ان شاء الله وبالف هنا على قلوبكم مقدما
[…] تابعي أيضاً: طريقة عمل فطيرة البيتزا السريعة […]