هعمل معاكم النهاردة الطعمية البيتي، مكوناتها بسيطة جدا، وطريقة تحضيرها في منتهي السهولة، وانظف واوفر بكتير من اللي بنشتريها من المحلات.
نقدر نعمل منها كمية كبيرة وتحتفظ بها في الفريزر في اكياس أو علب محكمة الغلق، ونطلعها وقت الاستعمال تبقي جاهزة معانا علي التسوية علي طول.
يلا بينا نبتدي في شرح الوصفة بالتفصيل بس الأول نشوف المكونات اللي هنحتاجها
مكونات الطعمية البيتي ⬇️
- نص كيلو فول مدشوش
- نص حزمة كرات أو 3 عيدان بصل اخضر
- ربع حزمة كسبرة خضراء
- بصلة صغيرة
- 5 أو 6 فصوص ثوم
- ملح – كسبره ناشفة – كمون – ربع ملعقة صغيرة بيكنج صودا
- – شطة اختياري
طريقة تحضير عجينة الطعمية⬇️
- نحتاج نص كيلو من الفول المدشوش
- نغسله أكثر من مرة ونشطفه جيدا
- ثم ننقعه من ساعتين ل ٣ ساعات فقط في كمية وفيرة من المياه
- ثم نصفيه جيدا من الماء ونتركه جانبا
- في محضرة الطعام نضع اول حاجة نصف حزمة من الكرات أو البصل الاخضر مايعادل نصف كوب او اقل
- ونص حزمة من الكسبرة الخضراء مايعادل نصف كوب
- نراعي عدم وضع خضرة زيادة عن المكتوب حتي لا يصبح بها سوائل كثيرة لوحتي لا يصبح لونها اخضر غامق
- ثم نضع عليهم 5 أو 6 فصوص من الثوم
- وبصلة صغيرة حجمها اد حجم الليمونة الكبيرة
- نخلطهم الأول لوحدهم جيدا
- ثم نضيف عليهم الفول المدشوش شوية بشوية مع الخلط
- وهنحتاج أيضا ربع كوب من الماء، نضيف منه شوية بشوية مع الخلط
- وكل شوية نوقف محضرة الطعام ونقلب المكونات جيدا من أسفل ومن الجوانب
- ثم نضع قليلا من الفول والماء ونكمل خلط
- نراعي أن نفصل محضرة الطعام قليلا حتي لا تسخن من الخلط
- نخلط حتي تصبح كل المكونات ناعمة
نراعي الآتي عند الخلط⬇️
- نضيف الفول شوية بشوية، وكل شوية نوقف ونقلب ونجيب من تحت ومن اسفل ومن الجوانب
- نضيف الماء أيضا شوية بشوية مع التقليب والخلط
- ونراعي عدم إضافة خضرة أكثر من اللازم
- نطحن حتي تندمج كل المكونات وتصبح ناعمة
كده خلاص تقريبا هي خلصت ناقص اخر خطوة
سر انتفاخ عجينة الطعمية البيتي وجعلها هشة من الداخل ⬇️
- نأخذ العجينة بعد طحنها جيدا ونضعها في العجان مع استعمال كف الخلط
- ونخلط جيدا مدة لا تقل عن 10 دقائق
- وكل شوية نوقف العجان وننزل الجوانب ونقلب الخليط
- خطوة استخدام العجان ديه بتفرق جدا في قوام عجينة الطعمية، دخل كمية هواء وبتجعل العجينة من الداخل هشة وخفيفة جدا
- في حالة عدم توفر العجان ممكن نستخدم المضرب الكهربائي أو المضرب السلك
كده أصبحت عجينة الطعمية جاهزة، نأخذ منها جزء نقليه ونحتفظ بباقي الكمية مقسمة حسب احتياجنا في اكياس أو علب محكمة الغلق في الفريزر، بعد خروج عجينة الطعمية من الفريزر نخلطها مرة أخرى بالمضرب الكهربائي أو المضرب السلك حتي تصبح هشة، نراعي وضع التوابل علي الكمية المراد وليس علي الكمية كلها.
طريقة قلي الطعمية البيتي ⬇️
- نأخذ جزء من العجينة
- نتبلها بملح وكمون وكسبرة ناشفة وشطة اختياري
- ونضع أيضا ربع ملعقة صغيرة من البيكنج صودا أو البيكنج بودر
- نخلطهم جيدا
- ثم نحضر طبق به قليل من السمسم والكسبره الناشفة المطحونة خشن
- وطبق اخر به قليل من الماء
- نضع ايدينا الأول في الماء نبلها خفيف
- نراعي عدم وضع اليد في الماء كثير حتي لا ندخل سوائل كثيرة في الطعمية
- ثم نأخذ جزء صغير من العجينة، ونشكلها باليد خفيف دون الضغط عليها، حتي تظل هشة ولا تصبح مكتومة من الداخل
- ثم نمسح اليد بالسمسم والكسبرة ونضعها علي الطعمية
- نشكلها علي شكل قرص مستدير ومفرود او كرات صغيرة زي ما تحبوا
- ثم نضعها في الزيت مباشرة
- الزيت بيكون غزير وسخن لكن مش بيغلي
والنار وسط - حتي لا تأخذ لون بسرعة من بره ومن وجوه تبقي نية
- واول ما ننتهي من تشكيل الكمية اللي عايزه علي اد حجم الطاسة
- نعلي النار
- الي أن تإخذ لون من تحت نقلبها علي الجهة الأخري
- تتحمر وتاخذ اللون الذهبي الحلو
- نطلعها علي طول، ونطلعها علي مصفاة وليس مناديل حتي تظل مقرمشة ولا تطري
تابعي أيضاً: طريقة عمل الأرز الريزو بالدجاج
طريقة تجميد الطعمية ⬇️
- ممكن نحتفظ بباقي الكمية مقسمة حسب احتياجنا في اكياس أو علب محكمة الغلق في الفريزر
- وبعد خروج عجينة الطعمية من الفريزر نخلطها مرة أخرى بالمضرب الكهربائي أو المضرب السلك حتي تصبح هشة
- نراعي وضع التوابل علي الكمية المراد تسويتها وليس علي الكمية كلها
- ممكن أيضا قلي الطعمية نص سوي بحيث نخرجها من الزيت ولونها فاتح
- ثم نتركها تصفي من الزيت ونقوم بفردها في صينية ووضعها في الفريزر حتي تتجمد
- وبعد ذلك يمكن تجميعها بمنتهي السهولة في اكياس
اسباب فك عجينة الطعمية أو تفتتها وعدم تماسكها وقت القلي وايضا سبب أن الطعمية تكون نية من الداخل⬇️
- نقع الفول المدشوش مدة طويلة بيدخل كمية كبيرة من الماء في الفول
- زيادة كمية الخضرة أيضا بيجعل السوائل في الطعمية كثيرة
- عدم طحن المكونات جيدا يجعل أيضا العجينة قاسية من الخارج ونية من الداخل
- درجة حرارة الزيت لو مرتفعة جدا أيضا تكون سبب أن الطعمية تكون نية من الداخل
ولحل هذه المشاكل عليكم اتباع الخطوات السابقة والمكونات بالتفصيل دون نقص أو زيادة.
الطعمية بالطريقة ديه بيكون لونها جميل اخضر فاتح ومقرمشة من الخارج ومن جوه طرية وهشة وخفيفة جدا
نعمل منها بقي وهي سخنة كده احلي سندوتش طعمية بالطماطم والطحينة ودوقوا بقي احلي طعمية
ولمعرفة اي تفاصيل اكثر عن الوصفة يمكنكم متابعة الفيديو
جربوها هتعجبكم جدا وبالف هنا علي قلوبكم مقدما
[…] تابعي أيضاً” طريقة تجهيز الطعمية البيتي علي أصولها […]