لعشاق الباذنجان هنعملهم النهارده وصفة رولات الباذنجان المشوى، من الوصفات اللذيذة جدا هنعملها بالكفتة ومن غير تحمير في الزيت ومش محتاجة مكونات كثير.
شرائح الباذنجان المشوى مع الكفته مع صوص الطماطم طعمهم مع بعض اكثر من رائع عشاق الباذنجان الوصفة ديه هتعجبهم جدا.
يلا بينا نعملها مع بعض بس الاول نشوف المكونات اللي هنحتاجها
مكونات الباذنجان المشوى
- كيلو ونصف باذنجان رومي
- من 600 ل 700 جرام لحم مفروم
- حزمة بقدونس
- ملعقة صغيرة من (الملح – فلفل اسود – الكزبرة الناشفة – البابريكا – ثوم بودر – بصل بودر )
- 2 ملعقة كبيرة صوص الباربكيو
- بصلة متوسطة
- 2 فص ثوم
- 2كوب عصير طماطم
- ملعقة صغيرة ( ملح – بابريكا – زعتر – فلفل اسود )
تقطيع الباذنجان ⬇️
- هنحتاج لوصفتنا كيلو ونصف من الباذنجان الرومي، طبعا الكمية أقل أو أكثر زي ما يعجبكم، عايزين الباذنجان المشوى يكون بشكل طولي شوية
- نقطع الجزء اللي من اعلي ونقشره من النصف دائر ما يدور الباذنجانة كلها
- هنقطع جزء واحد فقط من القشره وهنترك بقية القشرة موجودة كما هي، عشان القشره بتحافظ على الباذنجان يبقى متماسك وما يتهريش
- هنقطعها شرائح حجمها متوسط مش عايزينها ولا سميكة ولا رفيعة، والقشره بتبقى على جنب كل شريحه بتحافظ عليها انها تفضل حتى بعد التسويه متماسكة
- هنجمع كل كمية الباذنجان وهنحطها في مية مع ملعقتين كبار من الملح، نتركها بس 10 دقائق او ربع ساعة
- وعشان نضمن أن كل الباذنجان متغطي كويس بالميه ممكن نحط عليه اي غطا ثقيل
- وبعدين هنشطفه ونصفيه كويس من الميه وممكن نحطه على فوطة مطبخ وننشفه كويس جدا
طريقة تسوية الباذنجان المشوى ⬇️
- الباذنجان ممكن نعمله باكثر من طريقه نقليه في الزيت عادي جدا زي ما بنقلي الباذنجان بتاع المسقعة
- او نشويه في الفرن هنجيب الصينيه ونحط فيها ورق زبده ونضع عليها شرائح الباذنجان وندهن الشرائح بالزيت كويس جدا من الناحيتين وندخلها الفرن تاخذ لون ذهبي ونقلبها على الجهة الثانيه لحد ما تتحمر
- او في طريقه أخري وانا بفضلها اكثر، طاسة غير لاصقة نضعها علي النار ونمسحها بشوية صغيرين من الزيت ونرص فيها وحدات الباذنجان
- نتركها الي ان تاخذ لون ذهبي خفيف نقلبها على الجهة الأخري ونمسح الطاسة بالزيت
- ممكن مسح وحدات الباذنجان نفسها بالزيت الي أن تتحمر من الجهتين وتأخذ لون ذهبي حلو
- اعملوها بالطريقة اللي تعجبكم كلهم في الاخر نفس النتيجة لكن الفرق في كمية الزيت
- اهم حاجة الباذنجان يأخذ لون ذهبي مش غامق ويبقي متماسك مش مهري
- نخلص تخمير كل كمية الباذنجان بنفس الطريقة، ونتركها جانبا ونبدا في عمل الكفتة
تحضير الكفتة ⬇️
- نحضر اللحم المفروم، اللحم تكون مفرومة فرم ناعم مش خشن
- نضيف عليها حزمة بقدونس مفرومة ناعم، هناخذ الورق فقط
- التوابل اللي هنضيفها، ملعقة كبيرة من الملح وملعقة صغيرة من كل حاجة ( كزبره ناشفه، فلفل اسود، بابريكا، وبصل باودر، ثوم بودر )
- واخر حاجة هنضيفها 2 ملعقة كبيرة من صوص الباربكيو، وهو اختياري لكن بتدي طعم ومواقع حلو الكفتة للكفته مذاق حلو جدا معلقتين كبار من صوص الباربكيو
- هنخلط المكونات كلها مع بعضها، هنعجنهم كويس جدا، لحد ما المكونات كلها تتجانس مع بعضها وتبقى عامله زي العجينة
- نشكلها على شكل اصابع وكل قطعة قبل ما نشكلها هنعجنها ثاني برده بيدينا عشان تبقى متماسكة أكثر وما تفكش في التسوية
- نخلص تشكيل كمية الكفته كلها ونتركها في الثلاجة لمدة عشر دقائق فقط تتماسك
طريقة تسوية الكفتة ⬇️
- نضع طاسة علي نار عالية ونضع فيها ملعقتين من الزيت، نتركهم يسخنوا كويس، ثم نضع فيهم الكفتة بس منحطش وما نقلبش خالص لحد ما تحرك الطاسه كده بالراحة نلاقيها اتحركت، واول ما نلاقيها خذت لون ذهبي حلو، نقلبها بالراحة على الناحية الثانيه ونتركها حتي تستوي وتأخذ لون الكفتة الحلو ومنقلبهش لحد ما كلها تبقى لون واحد ومتماسكة، نطلعها في طبق ونضع باقي الكمية، ونسويها بنفس الطريقة، لحد ما نخلص الكمية كلها
- نجمع الكفتة كلها في نفس الطاسة وتعطيها ونتركها علي نار هادئة، تستوي علي بخارها
- وتبقي في الاخر مستوية كويس وواخذه لون حلو
- نطلع الكفتة علي طبق، وفي نفس الطاسة وعلي الدهون الموجودة، هنشوح شوية خضار بسيط نضعه من تحت الباذنجان بيتشرب من الصوص وبيعطي طعم ومزاق مميز ( لكن هو اختياري وممكن نستغنا عنه )
- هنحتاج بصلة متوسطة الحجم، وفلفل الوان نصف واحدة من كل نوع
- نقطعهم كلهم شرائح رفيعة الحجم، وفي نفس الطاسة وعلي الدهون المتبقية هنشوحهم لحد ما ياخدوا لون ذهبي خفيف نرفعهم في طبق ونتركهم جانبا
- وفي نفس الطاسة هنضع شوية زيت صغيرين
- نشوح فيهم بصلة متوسطه مفرومة، نقلبها تقلبتين بس تاخذ لون خفيف
- ونضيف عليها فصين من الثوم نفرمهم ونشوحهم مع البصل، نقلبهم تقليبتين مع البصل مش هنسيبهم كثير يادوب ريحة الثوم تطلع والبصل يذبل شوية
- نضيف عليهم 2 كوب من عصير الطماطم، تقريبا 4 أو 5 حبات من الطماطم خلطهم وصفيتهم
- ثم نضيف عليهم 2 ملعقة كبيرة من صلصة الطماطم،
- والتوابل اللي هنضيفها ملعقه صغيرة من كل حاجة( ملح, فلفل, وبابريكا, وزعتر ) و الزعتر لو اخضر او ناشف اللي موجود نستخدمه، هو بيعطي نكهة وطعم رائع
- ثم نضيف عليهم تقريبا كوب الا ربع من المية
- نقلب كله مع بعضه ونظبط الملح، ونتركها تغلي غلوتين، مش عايزين صوص الطماطم يبقي متسبك اوي، لانها لسه هتكمل تسويتها في الفرن
تابعي أيضاً: طريقة عمل طريقة عمل الكفتة بصوص الطحينة
- كده كل حاجة بقت جاهزة
- نحضر الطاجن أو الصينية اللي هندخلها الفرن
- نضع في قاعدة الصينية الخضار اللي شوحناه البصل والفلفل، نوزعهم يغطوا قعدة الصينية
- ونبتدي نلف الباذنجان هنعمله رول وهنحط في كل واحدة باذنجان واحدة من الكفتة ونلفها عليها
- ونحطها في الصينية والجزء المفتوح في اخر الرول نضعه من تحت
- نكمل كل الكمية بنفس الطريقة ونحطها في الصينية، لحد ما نخلص كل الكمية
- نضع عليهم صوص الطماطم وهندخلهم فرن ساخن علي درجة 200، نضعها في الرف الاوسط
- ونتركها تكمل تسويتها وتتسبك مع بعضها
- بس اهم حاجة منسبهش في الفرن كتير، هي كل حاجة فيها مستوية، عايزين يبقي فيها كمية كويس من الصوص متبقش ناشفة
- هنطلعها من الفرن تكون متسبكة وواخده لون حلو
- ممكن تتقدم زي ماهي كده وبتبقي حلوة جدا
- اونضيف عليها رشه بسيطه من الجبنه الشيدر او الموتزاريلا تعمل للوجه طبقه حلوة، وتعطي كمان طعم احلى هندخلها تحت الشواية ثواني بس ما نسيبهاش كثير يادوب الجبنة تسيح ونطلعها علي طول
- نزينها بشويه من البقدونس وتتقدم بالهناء
طبق لذيذ جدا وتغير في طعم الباذنجان والكفتة، ويعتبر وجبه كاملة مش محتاج جنبه غير شوية ارز بسمتي اوارز عادي
لمعرفة اي تفاصيل اكثر عن الوصفة والمكونات يمكنكم متابعة الفيديو
جربوه ومتاكدة انه هيعجبكم جدا وبالف هنا على قلوبكم مقدما
التعليقات مغلقة.