لكل محبي الطهي والوصفات الشهية

طريقة عمل عرق الروستو بطريقة حلوة وبسيطة جدا وطريقة ربطه بكل سهولة

256

هنتعلم مع بعض النهارده طريقة عمل عرق الروستو، هنعمله بكل خطواته بطريقه سهله وبسيطه جدا، وهنعمل معاه كمان الصوص البني بطعمه الخطير، طبق مميز جدا وطعمه اكثر من رائع، ممكن تعمليه في اي عزومه يشرفك على سفرتك

يلا بينا نبتدي في شرح وصفة طريقة عمل عرق الروستو بالتفصيل بس نشوف المكونات اللي هنحتاجها الاول

مكونات عرق الروستو ⬇️

  • عرق رستو وزن كيلو وربع او اي وزن
  • فصوص ثوم سليمة
  • فلفل اسود حب

تحمير عرق الروستو ⬇️

زبده او سمن -رز ماري فريش-ورق لورا-حبهان-مستكة-فصوص ثوم سليمه-بصله

الصوص البني (ديمي جلاس) ⬇️

  • ٤ ملاعق كبيرة ممسوحة ديمي جلاس
  • ٥ اكواب من شوربه سلق اللحم
  • كوب كريمة طهي
  • ملح
  • فلفل اسود

الصوص البني( بالدقيق) ⬇️

  • ٤ ملاعق زبدة
  • ٤ ملعقة كبيرة ممتلئة دقيق ( يحمر دقيق في السمن لحد ما يوصل للون الذهبي الغامق بسيط )
  • ٥ أكواب شوربه
  • كوب كريمة طهي
  • ملح
  • فلفل أسود
  • الخضار ( بطاطس – جزر – مشروم )

ملحوظة ( لو قوام الصوص كان خفيف اوي ممكن ندوب معلقة من الديمي جلاس او الدقيق في ربع كوب شوربة باردة او ميه ونضيفهم علي الصوص مع التقليب علي النار حتي يظبط قوام الصوص…ولو قوام الصوص تقيل نزود شوربة شوية بشوية )

 

طريقة عمل عرق الروستو ⬇️

  •  هنستعمل عرق الرستو وزنه تقريبا كيلو وربع
  • بطرف السكينه هنعمل فيه فتحات صغيرة
  •  هنحشيها بفصوص سليمة من الثوم والفلفل الاسود الصحيح، الثوم يفضل انه يكون فصوص صغيره، حتي لاتحتاج لعمل فتحات كبيرة في العرق
  • ممكن أيضا إضافة قطع رفيعة من الجزر مع الثوم والفلفل الاسود

طريقة ربط عرق اللحم الرستو ⬇️

العرق لو مربوط جاهز من عند الجزار مش هتحتاجي خطوة الربط

  • هنحتاج لخيط مخصوص يستخدم مع الطعام
  • نعدي الخيط من تحت العرق، ونلفه علي العرق بالطول، ونربطه جيدا
  • وناخذ بقيه الخيط وهنرجع نلفه على العرق بالطول ثلاث مرات
  • ثم نلف الخيط على اليد بشكل دائره، وندخل دائره الخيط حوالين العرق ونشد الخيط كويس
  • نكرر بنفس الطريقة، حتي ينتهي لف العرق بالكامل
  • ثم ناخذ طرف الخيط الاخير ونربطه مع طرف الخيط في الاول، تربطه جيدا حتي لا يفك وقت التسوية
  • طريقه بسيطه جدا ركزوا فيها هتعملوها بمنتهى السهولة،  يمكنكم متابعة الفيديو لمشاهدة طريقة ربط العرق بوضوح أكثر
  •  بعد الانتهاء من ربط العرق، نرش عليه رشة من الملح والفلفل الأسود المجروش، نتبله كويس جدا من كل جهة بالملح والفلفل الأسود المجروش الذي يعطي طعم ومذاق رائع للحم
  • يفضل عدم إضافة توابل كثيرة مع اللحم حتي نحتفظ بطعم اللحم الحلو

طريقة تسوية عرق الروستو ⬇️

  • في طاسة علي النار نترك تسخن، ثم نضيف بها ملعقة  كبيره من زيت الزيتون أو اي زيت نباتي مع ملعقة  كبيره من الزبدة أو ممكن نستخدم سمن
  •  نتركهم علي نار عالية يسخنوا، ثم نضيف العرق
  •  عايزين نعمل له صدمة حتي يحتفظ بالسوائل بداخله
  •  وهنضيف معاها اعشاب روز ماري ويفضل أنها تكون طازة، لانها من الاعشاب التي تعطي طعم ومذاق لذيذ مع اللحم
  • ونضيف أيضا فصوص من الثوم، مع فصين أو ثلاثه من الحبهان، مع فصين مستكه وورق اللوري
  •  وبصل متقطعة اربع
  • ونترك العرق يتحمر جيدا من كل جهة، ويأخذ ريحة حلوة من الاعشاب والتوابل
  •  واول لما يوصل عرق اللحم للون الذهبي الغامق من كل جهة
  • نرفعه من الطاسة، ونضعه في اناء عميق، ونضيف عليه كل الاعشاب والبصل، ونحتفظ فقط بالذبدة
  • ثم نضع عليه ماء ساخن جدا يكفي لتسوية العرق، ونضيف عليه أيضا حبة طماطم مقسمة الي نصين
  • نغطيه ونتركه علي نار عالية الي أن يغلي، ثم نهدئ النار ونتركه حتي يكمل سواه، ممكن يأخذ من ساعتين لساعتين ونصف حسب نوع اللحم

بعد عرق الروستو ما يستوي، نطلعه من الشوربة ونتركه يبرد تماما، ثم نضعه في ورق فويل عليه ورق زبدة، ونلفه جيدا، نضعه بالثلاجة يبرد تماما، ممكن نتركه ليلة كاملة، العرق الرستو كل ما نتركه يبرد تماما بيكون تقطيعه اسهل وطعمه بيكون احلي

طريقة تحضير الخضار ⬇️

  • علي الزبدة المتبقية من تحمير العرق، نضع عليها ملعقة أخري من الزبدة، ونشوح فيها شوية مشروم متقطعين قطع صغيرة، مع بصلة متقطعه شرائح رفيعة، مع معلقه كبيره من الثوم المفروم
  • نشوح كل المكونات مع بعضها ونضيف عليهم ملعقة صغيرة من الملح والفلفل الاسود، ونتركهم الي أن ياخذوا اللون الذهبي الحلو
  • نطفئ النار عليهم ونتركهم جانبا
  •  نحمر بطاطس وجزر متقطعين بالطول بسمك متوسط،  نسويهم حتي يصبح لونهم ذهبي، ممكن نسويهم في القلاية الهوائية، أو نضع عليهم قليل من الزيت ونسويهم في الفرن حتي يصبح لونهم ذهبي، نتركهم جانبا ونجهز باقي المكونات

طريقة عمل صوص البني ⬇️

يوجد طريقتين لتحضير الصوص البني

الطريقة الاولي بصوص الديمي جلاس الجاهز وده متوفر في السوبر ماركت بنفس الاسم او مكتوب عليه صوص لحمة

  •  اول حاجه هنعملها هنصفي الشوربه، هنحتاج تقريبا 4 اكواب من الشوربة باردة تماما او ممكن نحتاج اكثر حسب كمية الصوص
  • نضع لكل كوب من الشوربة ملعقة كبيرة ممتلئة من صوص الديمي جلاس
  • نقلبها الاول علي البارد
  • ثم نرفعها علي النار مع التقليب المستمر حتي يغلي الخليط ويصبح القوام له سمك لكن خفيف مش ثقيل، لانه قوامه هيتقل أكثر في الفرن
  • وقبل ما تطفي النار نضيف عليه كوب من كريمة الطهي، يعطي الصوص طعم ومذاق مميز جدا، نتركه يغلي غلوة واحدة فقط ونطفي عليه

الطريقة الثانية لتحضير الصوص بالدقيق

  • نضع 4 ملاعق زبدة علي النار
  • نضيف عليهم 2 ملعقة كبيرة دقيق
  • نحمرهم حتي يصبح لون الدقيق ذهبي غامق بسيط
  • ثم نضيف 4 كوب شوربة مع التقليب المستمر،  حتي يصبح القوام كريمي وسمكه مظبوط ليس ثقيل ولا خفيف
  • وقبل ما تطفي النار نضيف عليه كوب من كريمة الطهي، ونتركها حتي تغلي غلوة واحدة فقط ثم تطفأ عليها

شاهدي أيضاً: طريقة صينية فراخ بالبطاطس

طريقة تجهيز عرق الروستو مع الخضار والتسوية⬇️

  • نخرج العرق من الثلاجة ونقطعه شرائح بحجم وسمك متوسط
  • نحضر البيركس أو طاجن مناسب لحجم العرق، ونضع فيه جزء من الصوص البني يغطي قعدة الصينية
  • نقوم بوضع اللحم مع الخضار والمشروم بالتبادل مع بعض، صف من شرائح الروستو وصف من الخضار أو اعملوها بالشكل المفضل ليكم
  • وفي الاخر علي الوجه هنضع باقي كمية الصوص كله
  • ندخلها فرن ساخن مسبقا على درجة 200 مئوية، لمدة نصف ساعة أو حتي تندمج كل المكونات مع بعض وتتسبك
  • نخرجها من الفرن وتقدم وهي ساخنة مع رز ابيض

ملحوظة ⬇️

ممكن نستغني عن البطاطس والجزر والمشروم ونكتفي باللحمة مع الصوص فقط بيكون طعمها أيضا لذيذ جدا

 

طبق مميز وشيك جدا، يتقدم في العزايم او في اي وقت يتقدم على سفرتك بيشرفك

طريقته سهله وبسيطه جدا اتمني تجربوه ويعجبكم و بالف هناء على قلوبكم مقدما

لمعرفة تفاصيل اكثر عن الوصفة والمكونات يمكنكم متابعة الفيديو

 

بالهنا والشفا

التعليقات مغلقة.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبول قراءة المزيد