طريقة عمل كفتة اللحم في الطاسة بطريقة سهلة وبمكونات بسيطة وبطعم رائع مع الذ ارز بالخضار
وصفتنا النهاردة هنعمل مع بعض كفتة اللحم هنعملها بتتبيلة مميزة جدا وطعم أكثر من رائع، وهنعرف كل أسرارها اللي تطلعها معانا متماسكة ومتفكش مننا واحنا بنسويها.
وفي نفس الوقت تبقي هشة وطرية من جوه ومش مكبوسة ولا مكتومة، وهنسويها في الطاسة من غير فرن ولا شواية.
هنعمل معاها كمان الأرز بالخضار هنعمله بطعم مميز جدا. وجبة عائلية مميزة تنفع في العزائم أو في أي وقت تشرفك علي سفرتك.
يلا بينا نشوف المكونات وطريقة التحضير والتسوية المظبوطة جدا.
مكونات الكفتة باللحمة ⬇️
- كيلو لحمة مفرومة
- بصلة متوسطة مبشورة ناعم جدا
- ملعقة صغيرة ثوم مفروم
- ربع كوب بقسماط ناعم
- بيضة واحدة
- حزمة بقدونس هناخذ الورق فقط نقطعه صغير جدا
- حبة بطاطس متوسطة الحجم مسلوقة ومهروسة ناعم جدا
توابل الكفتة باللحمة
- ملعقة صغيرة ( ملح – فلفل اسود – بهارات – بابريكا – نص ملعقة صغيرة بيكنج صودا)
مكونات الرز بالخضار ⬇️
- 2 كوب ونصف رز بسمتي
- 2 جزرة مبشورة
- بصلة
- فص ثوم مفروم
- ( ملح – رشة فلفل – ملعقة صغيرة كركم )
- سمن وزيت
- شوربة أو مكعب مرقة
يمكنك أيضاً متابعة: طريقة عمل كفتة الارز المصرية
طريقة تحضير الكفتة باللحمة
- في طبق عميق نضع اللحمة المفرومة وعليها بصلة مبشورة ناعم جدا هنضعها بميتها زي ما هي.
- عليهم هنضع البقسماط الناعم وبيضة واحدة فقط ومنقلقش من طعم البيض مش هيظهر خالص في الكفتة.
- نضيف عليهم كمان معلقة صغيرة من الثوم المفروم حوالي 4 أو 5 فصوص ثوم وحزمة من البقدونس هنأخذ الورق فقط نقطعه صغير جدا ونضيفه عليهم.
- حبة بطاطس واحدة متوسطة الحجم هنسلقها كويس ونبشرها ناعم بالمبشرة أو هراسة البطاطس.
- عشان ناخذ افضل نتيجة للكفتة هنعجن المكونات ديه كلها بأيدينا مع بعض كويس جدا، عايزين المكونات كلها تندمج وأنسجة اللحمة تبقي متشابكة مع بعضها، ممكن نعجنها في محضرة الطعام هتسهل عليكم كتير.
- نبتدي بعد كده في تشكيل الكفتة، طبق فيه شوية زيت صغيرين نمسح أيدينا بيهم عشان يسهل علينا تشكيل الكفتة.
- نأخذ قطعة من الكفتة ونشكلها بالشكل اللي نحبه مدورة أو اصابع طويلة.
- اهم حاجة عايزين سمكها يكون متوسط عشان نضمن أنها تستوي من الداخل جيدا.
- نخلص تشكيل كل كمية الكفتة ثم نضعها في الثلاجة لمدة نص ساعة فقط.
تحضير الارز بالخضار
- حلة علي النار نضع فيها ملعقتين كبار من السمن مع ملعقة كبيرة زيت، يسخن كويس نضيف عليهم بصلة مفرومة.
- نشوح البصل تشويحة بسيطة ثم نضيف عليها فص ثوم مفروم، نقلبهم تقليبتين ريحة الثوم تطلع.
- نضيف عليهم 2 جزرة مبشورة ونقليها مع البصل والثوم تتشوح شوية.
- نضيف كيس من البسلة المجمدة أو الطازجة.
- نتبلهم بملح ورشة بسيطة من الفلفل وملعقة صغيرة كركم.
- نقلب المكونات مع بعضها تتشوح كويس مع التوابل اللي حطناها.
- نضيف 2 كوب ونصف من الرز البسمتي المغسول والمصفي من ميته.
- نشوح الرز مع المكونات ديه كلها كويس جدا وندي الخطوة ديه حقها في تشويح الرز يعني منستعجلش عليه ونسيبه يتشوح كويس.
- نضيف عليهم ورق لورا
- ثم نضيف الماء مع مكعب المرقة أو الشوربة.
- كل كوب رز بسمتي يأخذ كوب وربع ماء او ممكن يأخذ اكتر كوب ونص مثلا لأن كل نوع رز بيختلف عن التاني.
- نضع في الاول كوب وربع ماء لكل كوب رز وإذا احتاج نزود شوية بشوية لحد ما يستوي عشان ميعجنش.
- نتركه علي نار الاول يغلي ويتشرب ميته ثم نهدى النار علي الاخر ونتركه من 15 ل 20 دقيقة علي نار هادئة جدا حتي يستوي، وفي الوقت ده هنسوي الكفتة حتي يصبح الطعام كله سخن وجاهز في وقت واحد.
طريقة تسوية الكفتة باللحمة
- طاسة علي نار هادئة نضع فيها قليل من الزيت ونتركه يسخن، ثم نضع الكفتة.
- نتركها علي النار حتي تأخذ لون من تحت نقلبها علي الجهة الثانية والنار أيضا هادئة جدا.
- ممكن اخذ واحدة من الكفتة وفتحها للتأكد من تسويتها بشكل جيدا.
- نتركها علي نار هادئة حتي تسوي تماما.
- نرفعها من الزيت ونضعها في طبق عليها مناديل حتي تمتص كل الزيت الزيادة.
وكده كل حاجة استوت وبقت جاهزة.
الرز استوي مفلفل وريحته حلوة جدا، والكفتة اتحمرت وخدت لون حلو من فوق ومن تحت، ومن جوه مستوية كويسة هشة وطرية مش مكبوسة ولا ناشفة وطعمها خطير.
ممكن نجمع الكفتة باللحمة كلها في صينية ونسخن فحمة علي النار ونضعها في وسط الكفتة في طبق صغير ونضع علي الفحم ملعقة صغيرة من الزيت ونغطيها لتأخذ الكفتة ريحة الشوي الحلوة.
نحضر طبق التقديم نضع الرز في منتصف الطبق وحواليها نرص الكفتة.
يتقدم وهو ساخن جنب طبق سلطة خضراء او سلطة زبادي.
- وجبة عائلية حلوة جدا وبيتعمل منها كمية كويسة من الكفتة تكفي لعدد كبير.
- جربوها ومتأكدة أنها هتعجبكم جدا وبالف هنا علي قلوبكم مقدما.
لمعرفة المزيد عن الوصفة أو طريقتها بالتفصيل ارجو مشاهدة الفيديو.
التعليقات مغلقة.