يعتبر كحك العيد من اشهر حلويات العيد في مصر، ومن عاداتنا المحببة لينا جميعا في أواخر رمضان أن نجتمع دائما مع امهاتنا لعمل الكحك والبسكويت والبيتفور وعمل مالذ وطاب للعيد.
كانت تلك اللحظات من افضل وأسعد اللحظات علي قلوبنا، وتعودنا دائما علي عمل الكحك وحلويات العيد في المنزل لما لها من بهجة وإدخال الفرحة والسرور علي كل الأسرة.
وسوف نستعرض في موضوعنا اليوم طريقة عمل كحك العيد بكل تفاصيله لنسهل عليكي عمله بطريقة ناجحة ومضمونة 100٪ لإدخال الفرحة والسعادة علي الأسرة.
هنعمله بطريقة سهلة جدا ومكونات مظبوطة
المقادير مكتوبة كلها بالتفصيل بالجرام والكوب، يفضل طبعا استخدام الميزان لضمان دقة المقادير لكن لو مش متوفر وفي حالة استخدام الكوب هيكون كوب مقاس واحد اللي هنعاير بيه كل المكون.
تابعي معانا كمان: طريقة عمل بسكويت العيد الطريقة الأصلية
أسرار نجاح كحك العيد
- نوعية الدقيق المستخدمة لابد أن تكون مخصصة للكحك والبسكويت أو دقيق فاخر.
- كمية السوائل المضافة لو زادت الكحك هينشف ولو كانت قليلة الكحك هيكون ناعم جدا ويتكسر.
- لابد أن يبس الدقيق بالسمن كويس جدا مدة متقلش عن 10 أو 15 دقيقة باليد ولو بالعجان من 5 ل 6 دقائق.
- نسخن السمن فقط ولا توصل لدرجة القدح والغليان.
- نعجن حشوة الملبن أو العجوة بالسمن حتي تصبح طرية جدا.
- عشان نضمن أن الحشوة متخرجش من الكحك وقت التسوية ندخل الكحك علي درجة حرارة عالية لمدة من 15 ل 20 دقيقة ونتابع الفرن جيدا تخد لون من تحت نفتح عليها الشواية.
- الكحك السادة يدخل علي فرن حرارته متوسطة 160 أو 170 لمدة من 30 ل 35 دقيقة حتي نضمن التسوية من الداخل.
- مبنسبش الكحك يتخمر هو يرتاح 10 دقائق فقط وتشتغل بيه.
- الصينىة اللي تخلص ندخلها الفرن منسبهش تخمر.
- مبنحركش الكحك من الصواني الا لما يبرد تماما
طريقة عمل كحك العيد علي أصوله بريحة وطعم زمان
مكونات كحك العيد الدايب
- كيلو دقيق 1000 جرام.
- 550جرام سمن 2 كوب ونصف
- 100 مللي حليب نص كوب
- 100 مللي ماء نص كوب
- ملعقة كبيرة خميرة
- 2 ملعقة كبيرة سكر
- 4 ملعقة كبيرة سمسم
- ملعقة صغيرة بيكنج بودر
- ملعقة صغيرة ريحة الكحك
- اختياري اي مكسرات
- رشة ملح
مكونات حشوة العجمية
- عدد 2 ملعقة كبيرة دقيق
- 2 ملعقة كبيرة سمن
- ملعقتين كبيرة سمسم
- كوب عسل ابيض
- ربع ملعقة صغيرة فانيليا
مكونات حشوة الملبن
- ربع كيلو ملبن
- ملعقة كبيرة سمن
- ملعقة كبيرة سمسم
طريقة تحضير كحك العيد
تحضير حشوة العجمية
- في حلة علي النار نضع السمن وعليه الدقيق تقبلهم تقلبتين بس ونضيف اي مكسرات متوفرة وممكن الاستغناء عنها مع السمسم
- نشوحهم في السمن لون الدقيق بس يصفر ونضع عليهم كوب من العسل
- منسبش العجمية علي النار كتير
- اول ما العسل يغلي نتركه لمدة ثواني مع التقليب المستمر علي نار هادئة ثم نضيف الفانيليا ونقفل النار
- نحطه في طبق حتي يبرد ثم نشكله كور صغيرة ونتركه جانبا
تجهيز حشوة الملبن
- نضع الملبن في طبق ونضع عليه السمن والسمسم
- نعجنهم مع بعض كويس جدا
- نعملهم كور ونضعهم جانبا
طريقة عمل الكحك علي أصوله بريحة وطعم زمان
- نضع السمن في اناء ونرفعها علي النار تسخن فقط
- في الوقت ده نجهز المكونات الجافة
- في بولة عميقة نضع الدقيق وعليه رشة الملح نقلبهم جيدا
- ثم نضيف السمسم وريحة الكحك والبيكنج بودر
- تكون السمن سخنت نضيفها عليهم
- نقلب الاول بملعقة خشب حتي يتشرب الدقيق كل السمن
- نتركها جانبا لمدة ثواني ونجهز الخميرة
- نضع في نص كوب الحليب الدافئ الخميرة والسكر نقلبهم جيدا ونتركهم يتفاعلوا علي بال ما تخلص بس العجينة
- هنبس العجينة كويس اوي عايزين كل حبيبات الدقيق تتغلف بالسمن
- هنبسه با أيدينا مده متقلش عن 10 ل 15 دقيقة
- لو في العجان يبقي من 5 ل 6 دقائق
- بعد بس العجينة كويس اوي هنضيف الحليب بالخميرة
- في الخطوة ديه مش بنعجن يدوب بنلم الدقيق بالحليب
- نختبر العجينة نخد منها قطعة صغيرة ونكورها با أيدينا ونضغط عليها إذا شققت يبقي لسه محتاجة سوائل وهنصيف من النص كوب ميه الدافئ اللي معانا
- نضيف شوية بشوية ونلم العجين
- نختبر قطعة صغيرة لابد تكون مفيهش تشقق هي خدت معايا أقل من نص كوب الميه اتبقي منه معلقتين بس
- نغطيها ونتركها 10 دقائق فقط ترتاح شوية
تشكيل ونقش العجين
- نأخذ قطعة صغيرة من العجينة ونكورها بين أيدينا ونعمل فتحة في النص نحط فيها الحشوة
- نقفل علي الحشوة كويس اوي
- ننقشها بالمنقاش أو قوالب الكحك أو البصامة
- نرص الكحك في الصواني
- هتكون مسخنين الفرن
خبيز الكحك في الفرن
- الكحك اللي محشي هيدخل فرن ساخن علي 240 لمدة من 10 ل 15 دقيقة
- الكحك السادة يدخل فرن ساخن من 160ل 170 من 30 ل 35 دقيقة
- نتابع الفرن جيدا اول ما الكحك يخد لون من تحت نقفل الفرن ونفتح الشواية يخد لون من علي الوش
- نطلع الصواني من الفرن ونتركها حتي تبرد تماما
نرشه بالسكر وقت الاكل ودوقوا بقي احلي وأطعم كحك بسكر للعيد
كحك هش وخفيف ومفرغ من جوه مش مكبوس ولا مكتوم و متماسك لكن في نفس الوقت ناعم جدا وبيذوب في الفم حرفيا
جربوه ومتأكدة أنه هيعجبكم جدا فهي حقا وصفة تستحق التجربة
تابعي قناتنا علي اليوتيوب عشان تشوفي كل جديد معانا
لمعرفة المزيد عن الكحك يمكنكم متابعة الفيديو
وصحة وعافية علي قلوبكم مقدما.
[…] تابعي معنا: طريقة عمل كحك العيد […]