لكل محبي الطهي والوصفات الشهية

بسكويت العيد الطريقة الأصلية وبدون تعقيد بطعم احلي من المحلات

848

مهما عملنا انواع بسكويت بنكهات وأطعمة مختلفة يفضل طعم بسكويت العيد بشكله التقليدي وطعمه المميز من افضل انواع البسكوت.

يعتبر بسكويت العيد من اشهر حلويات العيد في مصر، ومن عاداتنا المحببة لينا جميعا في أواخر رمضان أن نجتمع دائما مع امهاتنا لعمل البسكوت والكحك والبيتفور وعمل مالذ وطاب للعيد.

كانت تلك اللحظات من افضل وأسعد اللحظات علي قلوبنا، وتعودنا دائما علي عمل البسكوت وحلويات العيد في المنزل لما لها من بهجة وإدخال الفرحة والسرور علي كل الأسرة.

وسوف نستعرض في موضوعنا اليوم عمل بسكويت العيد بكل تفاصيله لنسهل عليكي عمله بطريقة ناجحة ومضمونة 100٪ لإدخال الفرحة والسعادة علي الأسرة.

هنعمله بطريقة سهلة جدا ومكونات بسيطة من غير ماكينة ولا ادوات مخصوصة هنعمله بكيس الحلواني

المقادير مكتوبة كلها بالتفصيل بالجرام والكوب، يفضل طبعا استخدام الميزان لضمان دقة المقادير لكن لو مش متوفر وفي حالة استخدام الكوب هيكون كوب مقاس واحد اللي هنعاير بيه كل المكونات.

مكونات بسكويت العيد

– كيلو دقيق 1000 جرام
– 2 ونص كوب زبدة 500 جرام بحرارة الثلاجة
– ربع كوب سمن 100 جرام بحرارة الثلاجة
– نص كوب حليب بحرارة الغرفة
– 2 كوب وربع سكر بودرة 400 جرام
– 5 حبة بيض بحرارة الغرفة
– نص ملعقة صغيرة بيكنج بودر
– ملعقة صغيرة فانيليا
– رشة ملح

أسرار نجاح بسكويت العيد

1 – يفضل استخدام دقيق مخصوص للكحك والبسكويت أو دقيق فاخر وننخله قبل الاستخدام
2 – تستخدم الزبدة والسمن  باردة بحرارة الثلاجة وتكون الزبدة والسمن نوع جيد
ولإعطاء طعم مميز أكثر للبسكوت مثل الجاهز نستخدم خليط من الزبدة والسمن البلدي

3 – لعمل البسكوت بطعم النشادر نذوب ملعقة صغيرة 5 جرام مع الحليب ونكمل بنفس الطريقة والمكونات
4 – ولعمل البسكوت بطعم ونكهة  البرتقال او جوز الهند أو اي طعم اخر يتم خلطه مع البيض بدل من الفانيليا
5 –  لو حابين طعم السكر في البسكوت زيادة نزود ربع كوب كمان
6 – سكر البودرة لابد من نخله جيدا قبل الاستخدام
7 – البيض يكون طازة وبحرارة الغرفة

طريقة عمل بسكويت العيد

تجهيز عجينة البسكويت

  • اول حاجة هنخلط المكونات الجافة الدقيق ونضيف عليه البيكنج بودر نقلبهم جيدا ونتركهم جانبا
  • في العجان نضع الزبدة والسمن الباردة ويكونوا بحرارة الثلاجة
  • نضيف عليهم السكر البودرة المنخول
  • نخلطهم اول دقيقة علي سرعة منخفضة حتي تمتزج المكونات كلها ثم نعلي السرعة علي اعلي درجة هنخلط  لمدة من 10 ل 15 دقيقة حتي يصبح القوام كريمي واللون افتح الخطوة ديه مهمة جدا
  • واحنا بنخلط هنوقف كل شوية وننزل الجوانب ونقلب من تحت ونكمل خلط
  • لو هنستخدم المضرب الكهربائي نوقف كل شوية نريح المضرب ثم نكمل خلط
  • لابد أن نعجن في مكان بارد او علي الاقل في وجود مروحة
  • بعد ما نوصل للقوام الكريمي هنضيف البيض بيضة بيضة، نضيف بيضة ونخلط ولما تختفي نضيف الثانية لحد ما نخلط كل البيض، لابد ننتظر حتي تختفي البيضة قبل إضافة البيضة الثانية
  • اثناء خلط البيض هنضيف الفانيليا أو اي نكهة نحب طعمها البرتقال او جوز الهند أو اي طعم اخر
  • ثم نضيف الدقيق كله مرة واحدة ممكن في الوقت ده نخلط بمعلقة أو نكمل بالعجان بس هنغير ذراع الخلط بدل الشبكة هنضع الكف وهنخلط علي سرعة متوسطة
  • بعد وضع الدقيق نراعي عدم المبالغة في الخلط، بمعني اول ما المكونات كلها تختلط مع بعض نوقف خلط علي طول حتي لا يصبح البسكوت ناشف
  • ثم نضع الحليب شوية بشوية ونقلب الخليط بالمعلقة وفي المرحلة ديه مش هنعجن خالص احنا يدوب بنخلط الحليب مع العجين
  • كمية الحليب او السوائل عموما هي اللي بتتحكم في مدي نعومة البسكوت
  • البسكويت الناعم جدا نضع عليه أقل من نصف كوب حليب
  • بسكوت متماسك كوب الا ربع حليب
  • البسكوت المظبوط اللي بيكون ناعم وفي نفس الوقت متماسك هنضع نص كوب حليب

تابع أيضاً: طريقة عمل الكنافة بالقشطة

  • وكده تكون العجينة جاهزة ونبدا في تشكيلها

تشكيل العجينة وتحضير البسكويت

  • قبل تشكيلها هنسخن الفرن علي 180
  • هنحتاج لكيس الحلواني ولقمع البسكوت
  • نضع به العجينة ونشكل صوابع بالطول أو علي شكل زجزاج للتوضيح اكثر ممكن رؤية الفيديو
  • نترك مسافة بسيطة بين البسكوت
  • الصينية اللي تخلص نضعها في الثلاجة دقائق قبل دخولها الفرن
  • نضعها في فرن ساخن مسبقا من قبل التسوية علي الاقل بربع ساعة نضعها في الرف الاوسط هتأخذ من 15 ل 20 دقيقة أو اول ما نلاقيها خدت لون ذهبي من تحت، نفتح الشواية ونضع الصينية في اخر رف من أسفل حتي تأخذ لون ذهبي موحد
  • نخرج الصواني من الفرن مع عدم لمس البسكوت حتي يبرد تماما لانه بيكون سهل الكسر وهو ساخن

البسكوت بالطريقة ديه بيكون مستوي كويس جدا وواخد لون حلو اوي من فوق ومن تحت ومحافظ علي شكله ونقشته، هش وخفيف ومقرمش وفي نفس الوقت متماسك مش بيتكسر علي طول

المقادير لو مظبوطة وعملنا الخطوات بتاعتنا صح هيطلع معاكم احلي وأطعم بسكوت جربوه واتمني يعجبكم أن شاء الله وبالف هنا علي قلوبكم مقدما.

لمعرفة المزيد من المعلومات عن عجينة البسكوت وطريقة التشكيل يمكنكم متابعة الفيديو

 

بالهنا والشفا

2 تعليقات
  1. […] تابعي معانا كمان: طريقة عمل بسكويت العيد الطريقة الأصلية […]

  2. […] يمكنك أيضاً قراءة: طريقة عمل بسكويت العيد […]

التعليقات مغلقة.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبول قراءة المزيد