أسرع كيكة في المقلاة ( Fluffy Cake ) بدون فرن | سهلة وبسيطة تستحق التجربة
طريقة عمل اسرع كيكة في المقلاة بدون فرن
كيكة المقلاة أو الطاسة من الوصفات السهلة والسريعة وغير التقليدية، كيكة بصوص مكرمل طبيعي سهلة جدا، اي حد في البيت يقدر
يقوم يعملها، مكوناتها بسيطة جدا تقريبا موجودة في كل بيت، هنعملها بالمضرب السلك أو المعلقة مش هنحتاج مضرب ولا خلاط ولا
عجان، هنسويها في طاسة علي البوتاجاز مش هتحتاج فرن ولا قالب مخصوص، يعني من اسهل الكيكات اللي ممكن نعملها، الوقت
اللي بتخده كله بتجهيزها والتسوية من 15 ل 20 دقيقة يعني علي بال ما نعمل فنجان القهوة الصبح أو بعد الظهر ونسويها علي نار
هادئة هتكون الكيكة استوت.
مكونات كيكة المقلاة بدون فرن
3 وحدات موز
عصير نص ليمونة
2 ملعقة كبيرة ممتلئة سكر
2 ملعقة كبيرة زبدة أو سمن
ملعقة صغيرة قرفة ( اختياري )
مكونات الكيك
2 حبة بيض
( 160جم ) كوب دقيق وعليه معلقيتن كبار زيادة
( 100 مللي ) ربع كوب حليب
ملعقة صغيرة ممتلئة بيكنج بودر
نص ملعقة صغيرة فانيليا
( 60 جرام ) زبدة أو(سمن او زيت ) ربع كوب
3 ملعقة كبيرة ممتلئة سكر
طريقة تحضير كيكة المقلاة أو الطاسة بدون فرن
اول حاجة هنعملها هنقطع الموز الي شرائح متوسطة الحجم، هنعصر عليه نص ليمونة ونتركه جانبا.
في مقلاة غير لاصقة هنضع السكر ونفرده في الطاسة من غير تقليب، نرفع الطاسة علي نار هادئة واول ما نلاقي بدأ يتكرمل بسيط
نقلبه كله يخد لون واحد، عايزين لون السكر يبقي مكرمل فاتح.
نضع الموز المقطع ونقلبه تقليبتين بس مع السكر المكرمل ثم نضيف القرفة والمكسرات كله يخد تشويحة بسيطة جدا علي نار هادئة، نفرد الموز في الطاسة يغطي الطاسة كلها، ثم نطفأ النار علي بال مانجهز خليط الكيك.
في بولة هنضع البيض وعليه السكر والفانيليا، نقلبهم بالمضرب السلك شوية بسيطة لحد ما السكر بس يذوب، نسيب الخليط ده ثواني ونجهز الحليب الساخن.
في إناء علي النار هنضع اللبن والذبدة ونتركهم علي نار هادئة حتي تذوب الذبدة ويكون الحليب سخن قليلا، وفي الوقت اللي الحليب بيسخن فيه، هنضيف علي خليط البيض والسكر الدقيق والبيكنج بودر، ونقلب المكونات مع بعض الدقيق بس يختفي، المكونات هتكون تقيلة لسه عشان مفيهش اي سوائل.
في الوقت ده الذبدة هتكون ساحت والحليب سخن شوية هنضيفه علي الدقيق ونقلب علي طول، هنلاقي المكونات كلها امتزجت مع بعض بمنتهي السهولة واتكون خليط متوسط ليس خفيفا ولا ثقيلا.
هنضع الطاسة مرة أخري علي نار هادئة، ثم نضيف خليط الكيك يغطي الطاسة كلها.
نغطيها ونتركها علي نار هادئة لمدة من 10 الي 15 دقيقة فقط مش اكتر من كده.
الي أن يكتمل النضج، ونختبر نضج الكيك بعود خشبي من المنتصف، اذا طلع العود نظيف بدون اي عجين يبقي تمام لو لسه فيه عجين ممكن نسيبه دقيقة كمان.
بعد نضج الكيك، نقلبها علي الوجه الاخر لمدة دقيقة أو دقيقتين حتي يحمر الوجه الاخر ويخد لون الكيك الحلو.
بعد تمام النضج نقلبها في طبق التقديم ونرش علي الوجه سكر بودرة.
تقطع وتقدم دافئة.
ملحوظة مهمة
المقلاة أو الطاسة المستخدمة لابد أن تكون غير لاصقة والمقاس المستخدم 22 أو 24
لون السكر عند الكرملة لابد أن يظل فاتح حتي لا يغمق لون الكيك.
قوام الكيك يجب أن يكون متوسط ليس ثقيلا ولا خفيفا.
لابد أن يغطي الكيك كل الطاسة فوق سطح الموز.
نغطي المقلاة بغطاء محكم حتي تنضج جيدا.
كيكة المقلاة أسرع كيكة ممكن تتعمل واحنا مستعجلين أو عندنا ضيوف وعايزين نقدم ليهم حاجة حلوة مفيش اسهل من كيكة المقلاة بالموز أو ممكن نستبدله بالتفاح.
جربوها فهي حقا من احلي الوصفات التي تستحق التجربة
التعليقات مغلقة.