لكل محبي الطهي والوصفات الشهية

طريقة تحضير كيكة التمر والقشطة الذ وأطعم كيك ممكن تدوقوه

585

هنعمل مع بعض النهاردة وصفة من الوصفات الخطيرة وهي كيكة التمر أو البلح, احلي واطعم كيك ممكن تدوقوه جواها شوية نكهات وأطعمة مديه طعم رائع

وهنضيف عليها صوص كراميل اللي هنعمله مع بعض اقتصادي من غير كريمة ولا قشطة وبيطلع قوامه وطعمه اكتر من رائع.

طريقة تحضير كيكة التمر والقشطة

يلا بينا نبتدي في شرح الوصفة بالتفصيل بس الأول نشوف المكونات اللي هنحتاجها

مكونات كيكة التمر ⬇️

  • كوب تمر منزوع النوي
  • 3 حبة بيض بحرارة الغرفة
  • كوب سكر      225 جرام
  • 3 كوب دقيق   375 جرام
  • كوب الا ربع قشطة    175 جرام
  • كوب سمن علي زيت
  • نصف كوب حليب
  • ملعقة كبيرة ممتلئة بيكنج بودر
  • نصف ملعقة صغيرة بيكنج صودا
  • ملعقة كبيرة ممتلئة قرفة
  • نصف ملعقة صغيرة حبهان مطحون
  • رشة قرنفل مطحون
  • مكسرات اختياري

لمعرفة تفاصيل اكثر عن الوصفة يمكنكم متابعة الفيديو ⬇️

طريقة تحضير التمر ⬇️

  • نحتاج لكوب من التمر تقريبا 10 أو 12 واحدة تمر
  • نطلع منها النوي ونقطعها
  • نضيف عليها كوب من الميه الساخنة تكون سخنة بتغلي
  • وممكن تستعملوا بدل المياه الحليب زي ما تحبوا
  • نقلب التمر في الميه جيدا
  • ثم نتركها جانبا ونكمل باقي مكونات الكيك
  • وقبل اضافتها علي الكيك مباشرة نضع عليها نصف ملعقة صغيرة من البيكنج صودا

طريقة تحضير خليط الكيك ⬇️

  • في طبق عميق نضع 3 حبة بيض بحرارة الغرفة
  • وعليهم نضيف كوب من السكر
  • مش هنضيف سكر اكتر من كده عشان التمر مسكر وهنزينها كمان بصوص كراميل فيعتبر السكر كده كفاية اوي
  • نخلطهم مع بعض جيدا الي أن يفتح لون البيض والسكر يدوب ويعمل فوم
  •   ممكن تستعملوا العجان أو المضرب الكهربائي أو نكتفي بالمضرب السلك
  • ونضيف عليهم ملعقة صغيرة من الفانيليا
  • ونخلطهم جيدا
  • ثم نضع عليهم كوب من المادة الدهنية، ممكن مثلا  نضيف نص الكوب زيت والنصف الآخر سمن سائحة
  •  أو نضيف الكوب كله سمن او زبدة أو زيت زي ما تحبوا
  • ونكمل خلط
  • ثم نضيف عليهم علبة من القشطة أو كوب الا ربع من القشطة البلدي
  • أو ممكن تستعملوا القشطة بتاعت وش اللبن
  • ونخلط كل المكونات مع بعضها جيدا الي أن تندمج مع بعضها ويصبح القوام القوام كريمي
  • ثم نحضر التمر وبملعقة أو بشوكة نضغط عليها يتهرس بس شوية بسيطة
  • ثم نضيف عليه نصف ملعقة صغيرة من البيكنج صودا تساعد علي رفع الخليط وحتي لايسقط وقت التسوية لأن التمر قوامه تقيل
  • نقلبه جيدا
  •  ثم نضيفه علي خليط الكيك
  • ثم نضع عليهم شوية نكهات بتليق جدا مع التمر وبتدي الكيك طعم رائع
  • نضيف نص معلقة صغيرة من الحبهان المطحون ومعلقة كبيرة ممتلئة من القرفة ورشة بسيطة اوي من القرنفل المطحون ونخلطهم  مع بعض جيدا

تابعي أيضاً: طريقة عمل كيكة اللاتيه

  • في طبق اخر ننخل 3 اكواب من الدقيق
  •  مع ملعقة كبيرة ممتلئة من البيكنج بودر
  • ثم نضيفهم علي الخليط شوية بشوية مع التقليب
  • نخلط الي أن يختفي الدقيق
  • مع مراعاة عدم المبالغة في التقليب
  •  القوام هيكون تقيل هنضيف عليه نصف كوب من الحليب الساخن
  • ثم نخلط بخفة، هتلاقوا الخليط اندمج علي طول والقوام بقي ناعم وكريمي
  • واخر حاجة هنضيفها نص كوب من عين الجمل او اي مكسرات متوفرة
  • ونخلطهم مع الخليط وكده الخليط اصبح جاهز
  • ثم نضع الخليط في صينية مدهونة بالزبدة وعليها رشة من الدقيق
  • وندخله فرن ساخن مسبقا من اول ما بدأنا في عمل الكيك علي درجة 170
  • نضعها في الرف الاوسط
  •  ونتركها من 40 ل 45 دقيقة
  • ونختبر نضج الكيك بعود خشب من المنتصف لو طلع نظيف يبقي كده استوت
  • لكن لو فيه عجين نتركها خمس دقائق أخري

وفي الوقت اللي الكيك بتسوي فيه هنعمل صوص الكراميل بدون قشطة أو كريمة

تحضير صوص الكراميل ⬇️

  • حلة أو طاسة عميقة نضع فيها كوب من السكر
  • مش هنقلب في الاول خالص
  •  نحرك فقط الطاسة حتي يتفرد السكر في قعدة الطاسة
  • وهنسيبها علي نار هادئة لحد ما نلاقي السكر بدأ يخد لون خفيف من المنتصف أو من الجوانب
  • نقلب وقتها علي طول عشان كل السكر يخد لون واحد ويدوب
  • مع مراعاة أن النار تكون هادئة حتي لا يحترق السكر ويصبح طعمه مر
  • واول ما يذوب السكر تماما
  • نضيف ملعقة كبيرة ممتلئة من الزبدة
  • ونقلب حتي تذوب تماما
  • ثم نضيف كوب من الحليب ونترك منه 2 ملعقة كبيرة نذوب فيهم ملعقة كبيرة من النشا
  • اول ما نضيف الحليب هتلاقي السكر كله اتكتل، نستمر في التقليب علي نار هادئة حتي يفك التكتل ويصبح قوامه خفيف بدون أي كتل
  • نضيف عليه خليط النشا سابق التجهيز مع التقليب
  • حتي يصبح القوام اتقل وفي نفس الوقت ناعم
  • واول ما تغلي نطفئ النار
  • ونضعها في برطمان أو علبة ونتركها حتى تبرد تماما
  • مع مراعاة تغطية الصوص حتي لا تتكون قشرة علي الوجه
  •  القوام المظبوط لصوص الكراميل بيكون ناعم وخفيف لأن بعد ما يبرد القوام بيكون اتقل قليلا

وضع الصوص علي كيكة التمر مع التقديم ⬇️

  • الكيكة استوت تماما نطلعها من الفرن ونتركها الي أن تبرد
  • نضع عليها صوص الكراميل ونزينها بشوية من المكسرات

نقطعها ونقدمها بالف هنأ

ودوقوا احلي كيكة تمر طعمها رائع طرية وهشة وخفيفة

ومن الكيكات الحلوة اوي اللي الولاد هيحبوها جدا وممكن يفطروا بيها قبل ما يروحوا المدرسة

ويمكننا نحنا تناولها مع فنجان القهوة الصبح بتبقي رائعة

أيضا هي من الكيكات السريعة والشيك جدا في التقديم  اللي ممكن تتعمل بسرعة لو عندنا ضيوف طعمها حلو وتشرفك قدامهم

 

لمعرفة تفاصيل اكثر عن الوصفة والمكونات يمكنكم متابعة الفيديو

جربوها هتعجبكم جدا وبالف هنا علي قلوبكم مقدما

بالهنا والشفا

التعليقات مغلقة.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبول قراءة المزيد