مطبخ جيهان عزب لكل محبي الطهي والوصفات الشهية

طريقة عمل السينابون | الذ واطري وصفة سينامون رولز

559

النهاردة هنعمل مع بعض اقوي وانجح وصفة سينابون رولز ممكن تعملوها بتطلع هشة وطرية وناعمة وطعمها أكثر من رائع.

السينابون اللي دايما بنحب نشتريه من بره مع ان طريقة تحضيره في البيت سهلة وبسيطة جدا، ومبيخدش وقت في تحضيره تماما، كل الوقت بيكون في التخمير فقط

ونتيجته بيطلع هش وخفيف وطعمه أكثر من رائع واحلي بكتير جدا من اللي تشتريه من بره.

هنعمل معاه كمان الصوص الأبيض بطعمه الخطير

طريقة عمل السينابون

يلا بينا نبتدي في عمايله علي طول بس الاول نشوف المكونات اللي هنحتاجها ⬇️

مكونات السينابون ⬇️

  • 3 كوب دقيق 390 جرام
  • كوب حليب دافئ + 2 ملعقة كبيرة 225 جرام
  • ربع كوب زبدة سائحة 60 جرام
  • 1 بيضة بحرارة الغرفة
  • 3 ملعقة كبيرة ممتلئة سكر 40 جرام
  • 1 ملعقة كبيرة خميرة فورية 7 جرام
  • نصف ملعقة صغيرة ملح

حشوة السينابون ⬇️

  • نصف كوب سكر بني أو أبيض 90 جرام
  • 5 أو 6 ملاعق كبيرة ممتلئة زبدة طرية 75 جرام
  • 2 ملعقة كبيرة قرفة
  • نص ملعقة صغيرة كاكاو خام

الصوص الابيض ⬇️

  • 2/3 كوب جبن كريمي 80 جرام
  • 3 ملاعق كبيرة ممتلئة زبدة طرية 45 جرام
  • 1 كوب سكر بودره 125 جرام
  • نصف ملعقة صغيرة فانيليا

تحضير عجينة السينابون ⬇️

  • اول حاجة قبل ما نبدأ في العجينة هنختبر الخميرة الاول عشان نتأكد أنها شغالة
  • في بولة عميقة نضيف كوب من الحليب ونزود عليه كمان 2 ملعقة كبيرة ممتلئة من الحليب، الحليب بيكون دافئ بسيط اوي عشان ميموتش الخميرة
  • ونضيف عليهم ٣ ملاعق كبيرة ممتلئة من السكر
  • وملعقة كبيرة من الخميرة
  • نخلطهم جيدا ونتركه فقط خمس دقائق الي أن نجد فقاعات من علي الوجه نعرف ان الخميرة شغالة كويس
  • ثم نبدأ في وضع كل المقادير المتبقية علي الخميرة
  • نضع بيضة بحرارة الغرفة
  • وربع كوب من الذبدة السائحة او ممكن نستعملها سمن او زيت
  • ونص ملعقة صغيرة من الملح
  • نخلطهم مع بعض جيدا
  • ثم نضع 3 اكواب من الدقيق
  • نخلط كل المكونات جيدا مع بعضها ونعجنها لحد ما كل المكونات تتجمع مع بعض
  • ثم علي اي سطح نرش رشة بسيطة من الدقيق ونضع العجينة ونعجنها بأيدينا مدة لا تقل عن 6 أو 7 دقائق
  • ممكن طبعا استخدام العجان في خلط كل المكونات
  • العجينة بتكون طرية وبتلزق، لكن عارفين نلمها، إذا لقتوها طرية اوي ومش عارفين تلموها زودا معلقة من الدقيق
  •  لان طبعا كل نوع دقيق بيختلف عن التاني
  • بس اهم حاجه منزودش الدقيق اوي عشان متنشفش منكم
  • عجينة السينابون كل ماكانت طرية وبتلزق في الايد بسيط هيطلع السينابون طري وحلو جدا
  • ثم نضع العجينة في بولة مسحناها بالزيت الاول
  • نغطيها ونتركها حتي تخمر أو لحد ما نلاقي حجمها اتضاعف ممكن تخذ ساعة أو أكثر حسب درجة حرارة الجو

وعلي ما العجينة تخمر هنجهز الحشوة اللي هنستخدمها

ممكن كمان تشوفوا: طريقة عمل كيكة السينابون في الميكروويف

طريقة تحضير الحشوة ⬇️

  • هنحتاج نص كوب من السكر، سكر بني أو سكر ابيض الموجود منهم نستخدمه
  • وملعقة ونصف او ملعقتين كبار من القرفة
  • وملعقة صغيرة من الكاكاو
  • الكاكاو مش اساسي في الوصفة ممكن طبعا تستغنوا عنه لكن عند وضعه بيعطي طعم حلو للحشوة
  • نخلط كل المكونات بالمضرب الكهربائي جيدا مع بعض ونتركهم جانبا
  • وهنحتاج أيضا في الحشوة للزبدة، هنحتاج ٥ أو ٦ ملاعق كبيرة ممتلئة من الذبدة الطرية بدرجة حرارة الغرفة

فرد العجينة ووضع الحشوة ولفها روول ⬇️

  • العجينة اختمرت وحجمها اتضاعف
  • نضعها علي سطح عليه رشة من الدقيق ونفردها علي شكل مستطيل
  • نستخدم النشابة في فردها بس نمسحها الاول بالدقيق
  • المستطيل مقاسه تقريبا ٤٥ سم × ٣٥سم سمكه بيكون متوسط مش رفيع أوي ولا سميك
  • ثم نضع عليه الزبدة الطرية نفردها تغطي سطح العجينة كلها، الزبدة تكون طرية بحرارة الغرفة ليس متماسكة ولا سائلة حتي يتم توزيعها بطريقة صحيحة علي العجينة
  • بعد ما نخلص فرد كل كمية الزبدة نوزع كل كمية السكر والقرفة الي تم خلطهم مع  بعض في السابق
  • عند توزيع الحشوة لا نصل للطرف الاخير، حتي نتمكن من قفل الرووول جيدا، وعند تقطيعه الطرف يظل مقفول لا يفتح في التسوية
  • وحتي نثبت السكر علي العجينة جيدا، هنضغط عليها باايدينا أو بالرول عشان يثبت في العجينة اكتر وميقعش منها واحنا بنلفها
  • ثم نبدأ في لف العجينة علي شكل روول
  •  عند لفها رول بنقفلها جيدا، نضغط عليها بخفة حتي تصبح متماسكة ولايوجد فيها فراغات حتي لا تفك عند تقطيعها
  • بيكون الرول كله مقفول علي بعضه بشكل حلو ومتماسك
  • وفي آلاخر خالص هنقفل الطرف كويس اوي علي بعضه
  • خطوة قفل الطرف علي بعضه ديه مهمة جدا حتي لا يفتح الطرف عند التسوية
  • ثم نحاول نقسمها بالنظر كده أو ممكن بالمسطرة
  • نقسمها الاول لنصين وكل نص نقسمه نصين يبقي عندي كده ٤ أجزاء
  • هنخد كل جزء منهم نقسمه ل ٣ يعني تقريبا يبقي سمك كل واحدة تقريبا ٤ أو ٥ سم
  • وافضل حاجة نقطع بيها واحدات السينابون وميتقطعش ويتبهدل مننا الخيط (خيط اسنان او خيط عادي)
  • وممكن نقطع بس جزء بسيط الطرف اللي في الاول عشان بيبقي شكله مش مظبوط اوي
  • ثم نقطع الكمية كلها
  • هتطلع معانا ١٢ واحدة لو عايزين حجمها كبير اوي ممكن نقسمها ل ١٠ بس
  • ثم نحضر صينية ندهنها جيدا بالزبدة أو السمن من كل جوانبها
  • ونضع فيها واحدات السينابون ونترك مسافة بينهم عشان لسه لما هيخمروا حجمهم هيزيد
  • وبعدين نغطيها ونضعها في مكان دافئ حتي يتضاعف حجمه

طريقة تسوية السينابون ⬇️

  • ندخلها فرن ساخن مسبقا علي درجة ١٨٠
  • تأخذ تقريبا من ٢٠ل ٢٥ دقيقة
  • منزودش عليها في وقت التسوية زيادة عن اللزوم
  • اذا احتاجت في الاخر ممكن نفتح الشواية تخذ لون بسيط من علي الوجه

و في الوقت اللي بتستوي فيه هنجهز الصوص الابيض اللي هنحطه عليها

طريقة تحضير الصوص الابيض ⬇️

  • نحتاج تلتين كوب من الجبن الكريمي، نستعمل اي نوع جبنة سوفت اهم حاجة متكونش مملحة
  • نضع عليها ٣ أو ٤ ملاعق كبيرة ممتلئة من الزبدة الطرية
  • نخلطهم مع بعض الاول جيدا حتي يصبح قوامهم ناعم وكريمي
  • ثم نضيف عليهم نص ملعقة صغيرة من الفانيليا
  • وكوب من السكر البودرة ننخله الاول قبل ما نضيفه
  • ونرجع نكمل خلط لحد ما المكونات كلها تتجانس مع بعضها والصوص يبقي ناعم وكريمي جدا
  • الكميات اللي تم استعمالها ترجع ليكم ممكن تزودا أو تنقصوا زي ماتحبوا وخصوصا كمية السكر ممكن تبتدوا بكوب ال ربع وإذا احتاج نزود السكر شوية
  • وكمية الزبدة أيضا ترجع ليكم حسب انتم حابين طعم الزبدة في الصوص يبقي خفيف ولا تقيل
  • نخرج الصينية من الفرن بعد ما استوت وخذت اللون الذهبي الحلو من علي الوجه
  • نترك الصينة تهدا بس ه أو ١٠ دقائق وبعدين نوزع عليها الصوص هي بتبقي لسه سخنة لكن هديت شوية
  • نفرد الصوص عليها وهو من السخونية هيسيح وينزل من علي الجوانب يغطي السنابون كلها
  • هي بتتقدم علي طول لما نحط عليها الصوص وهي لسه دافئة
  • الريحة طبعا مالية البيت كله
  • بسبب المكونات الحلوة اللي احنا حطينها كلها القرفة والزبدة دول لوحدهم بيحلوا طعم اي حاجة نحطهم فيها
  • لو عاملين كمية كبيرة ومش هتتاكل كلها في نفس الوقت
  • منحطش عليها الصوص ونسيبها تبرد ونحطها في أكياس أو علب محكمة ونحطها في الفريزر
  • نطلعها قبل الاكل مفيش ١٠ دقائق وندفيها في الميكروويف هتبقي كأنها لسه معمولة ونحط عليها من الصوص زي ما احنا عايزين
  • ممكن كمان تزودا وتحطوا اي صوص تحبوا طعمه صوص شوكلاتة صوص كراميل ممكن حليب مكثف زي ماتحبوا

النتيجة في الاخر بتبقي حاجة كده طرية وناعمة وهشة جدا وطعمها اكتر من رائع

وصفة حلوة اوي وسهلة ومكوناتها بتحاول نظبطها باللي موجود في البيت واهم حاجة مبتخدتش وقت خالص في تحضيرها وصدقوني طعمها احلي بكتير جدا من اللي بنشتريها من بره

لمعرفة اي تفاصيل اكثر عن الوصفة والمكونات يمكنكم متابعة الفيديو

جربوه ومتاكدة انها هتعجبكم وهتدمنوا طعمها وبالف هنأ علي قلوبكم مقدما

بالهنا والشفا

التعليقات مغلقة.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبول قراءة المزيد