هعمل معاكم االنهاردة العيش الشامي في البيت سهل وبسيط جدا ومكوناته بسيطة بنص كيلو دقيق بس، هنعمله من غير فرن في الطاسة علي طول، طريقة تحضيره سهلة وبسيطة وسريعة جدا
ساعة زمن ويكون جاهز للفطار أو العشاء أو نعمل بيه احلي سندوتشات تنفع للمدرسة وممكن كمان نعمل فيه حشوات سريعة ومختلفة طعمه بيكون رائع مع أي حشوة هنحطها فيه
و يوم الجمعة نعمله الصبح بدري نفطر بيه مع لمة العيلة يبقي احلي عيش طازة ممكن تدوقوه طعمه لذيذ جدا.
يلا بينا نبتدي في شرح الوصفة بالتفصيل بس الأول نشوف المكونات اللي هنحتاجها ⬇️
المكونات ⬇️
- 3 كوب وربع دقيق 500 جرام
- ملعقة كبيرة ممتلئة خميرة 10 جرام
- ملعقة كبيرة ممتلئة سكر
- نص ملعقة صغيرة ملح
- 3 ملعقة كبيرة لبن بودرة بديله ( كوب ونص حليب )
- 2 ملعقة كبيرة ممتلئة زبدة أو سمن او زيت
طريقة تحضير عجينة العيش الشامي⬇️
- اول حاجة هنعملها هنجهز العجينة، وزي اي مخبوزات عملناها قبل كده بنختبر الخميرة الاول
- نحتاج كوب ونص من الميه الدافئة
- في طبق عميق نضيف كوب فقط الاول من الميه الدافئة ونترك النص كوب التاني جانبا هنستعمله وقت العجن
- الميه بتكون دافئة زي دمعت العين و لو الجو حر هنستعملها زي ماهي بدرجة حرارة المطبخ
- ونضيف عليه ملعقة كبيرة ممتلئة من السكر
- وكيس الخميرة كله اللي هو 10 جرام لو هنعاير بالملعقة تبقي ملعقة كبيرة ممتلئة
- نقلبهم جيدا مع بعض السكر يدوب، ونغطيها ونتركها لمدة 5 دقائق الخميرة تتفاعل ونتأكد أنها شغالة
- في طبق اخر نضع 3 كوب وربع من الدقيق
- ثم نضيف عليه نص ملعقة صغيرة من الملح
- نقلبه جيدا ثم نتركه جانبا
- بعد كده 5 دقائق الخميرة تفاعلت هنضيف عليها بقية المكونات كلها
- 3 ملاعق كبيرة ممتلئة من اللبن البودرة
- وملعقتين كبار من الزبدة أو السمن أو الزيت المتوفر منهم نستخدمه
- لو عايزين تعملوه اقتصادي ممكن تستغنوا عن اللبن البودرة والزبدة ونعمله بالميه فقط
- لكن لو عايزين الطعم يبقي غني أكثر هنضيفهم
- وممكن نستبدل اللبن البودرة ونستعمل الكمية كلها حليب طبيعي
- أو نص الكمية الأكبر حليب والباقي ميه
- يعني زي ما يعجبكم بدلوا في المكونين دول
- نخلطهم مع بعض جيدا
- ثم نضيف عليهم كمية الدقيق كلها مرة واحدة
- كده احنا ضيفنا خلاص كل المكونات مفضلش غير بس نص كوب الميه الدافئة، وده هنضيفه واحنا بنعجن زي ما العجينة تخد معانا
تابعي أيضاً: طريقة عمل بيتزا العيش الفينو من غير دقيق ولا عجين
- نعجن المكونات كلها مع بعضها ونلم العجينة كويس اوي
- ونشوف هتحتاج ميه اد ايه لان كل دقيق بيختلف عن التاني فدرجة امتصاصه للسؤائل
- نضيف كمية الميه تدريجيا، وديه خطوة مهمة جدا لان لو ضيفنا كمية الميه كلها مرة الوحدة العجينة ممكن تبقي سايبة وخفيفة فنزود دقيق عشان نظبط قوام العجينة هنلاقي المكونات اتغيرت كلها
- إذا لقيتوا العجينة ناشفة زودا شوية بشوية ونكمل عجن
- لحد ما تصبح العجينة طرية وبتلزق بسيط في ألايد
- علي اي سطح نضيف رشة من الدقيق ونكمل عجن العجينة لمدة لا تقل عن 8 أو 10 دقائق عجن باليد
- في حالة استخدام العجان تعجن من 6 ل 7 دقائق علي درجة متوسطة
- كمية الميه اللي ضيفتها علي النص كيلو دقيق كوب وربع فقط
- نكمل عجن الي أن تصبح العجينة متماسكة قليلا، بس في نفس الوقت طرية وناعمة مش ناشفة عشان العيش ميطلعش ناشف
- نحضر طبق عميق ونمسحه بمسحة خفيفة من الزيت ونضع فيه العجينة
- نغطيها ونتركها لمدة نص ساعة في مكان دافئ ترتاح وتخمر شوية
- ثم نخرج منها الهواء
- ونقسمها الي كورات متساوية بالحجم
- نراعي تغطية العجينة حتي لا تجف
- ممكن نعملها كورات حجمها متوسط 50 جرام مثلا، والكمية ديه تعمل حجم العيش الشامي الصغير
- في حالة لو عايزين اكبر زودوا ل 60 أو 70 جرام زي ما تحبوا حجم رغيف الخبز
- ممكن استخدام ميزان المطبخ لعمل كورات متساوية الحجم
- النص كيلو دقيق هيعمل تقريبا من 12 ل 16 رغيف حسب حجم الخبز
- نتركها ترتاح 10 دقائق فقط مع مراعاة تغطيتها جيدا
- علي سطح المطبخ نضع رشة من الدقيق
- ونأخذ اول واحدة عملناه كورة ونكمل تدريجيا باللي اتعمل الاول، عشان يكون خد وقت من الراحة
- نفردها بسمك متوسط
- لو عايزين العيش سمكه رفيع افردوها زيادة
- لكن لو عايزينه يبقي تقيل ومليان نفرده بسيط
- وكل واحدة نفردها نحطها علي فوطة نظيفة ونغطيها، والخطوة ديه مهمة جدا
- نحاول تنظيف العيش من الدقيق الزيادة وممكن نستخدم مثلا فرشاة تساعدنا في تنظيفه أو باليد
- مع مراعاة التعامل بحرص حتي لا يحدث أي فتح في العيش يمنع انتفاخه عند التسوية
- بعد الانتهاء من فرد الكمية كلها
- اللي اتعمل في الاول هنلاقيه انتفخ وحجمه زاد شوية وده اللي هنبدا بيه في التسوية ونكمل تدريجيا باللي اتعمل في الاول
تسوية العيش الشامي
- نأخذواول واحدة تم فردها ونبتدأ في تسويتها
- نضع الطاسة علي نار متوسطة ونتركها تسخن قبل وضع الخبز
- ثم نضع الخبز ونضعه بحرص حتي لا يفتح
- طريقة التسوية التقليب كل شوية، نقلبه علي الجهة الأخري
- الخطوة ديه بتجعل سمك العيش من فوق زي تحت
- حتي لا يصبح خفيف من علي الوجه ومن القعدة يكون سميك
- لا نتركه علي جهة واحدة فترة طويلة حتي يستوي جيدا من الداخل والخارج وينتفخ بصورة حلوة
- نراعب وضع الطاسة علي نار متوسطة وعدم المبالغة في التسوية حتي لا يجف، يعني تقريبا ياخذ دقيقة لكل رغيف
- اول ما ينتفخ ويخذ لون ذهبي خفيف من الجهتين نرفعه من علي النار
- اللي نطلعه نضعه مباشرة في حاجة محكمة ونقوم بتغطيته بفوطة نظيفة حتي لا يجف
- بعد ما يبرد يصبح طري وناعم وطعمه رائع
طريقة تقديم العيش الشامي ⬇️
- ممكن وهو ساخن إضافة الزبدة السايحة ومسح الوجه بها مع إضافة الثوم المفروم ناعم حسب الرغبة
- وممكن ايضا وضع زيت زيتون وزعتر أو بقدونس
- ويأكل كما هو بيكون طعمه لذيذ جدا
- أو ممكن استخدامه في السندوتشات ووضع حشوات مختلفة فيه
- أهمها حشوة الطعمية البيتي مع إضافة خس مقطع صغير وطماطم شرائح وفلفل وعلي الوجه وضع الطحينة، سندوتش رائع للفطار
- وعلي سبيل المثال يوجد حشوات أخري مختلفة
- مثل حشوة تونة بالخضار مثل الفلفل الالوان والبصل الاخضر والزيتون والمايونيز
- أو حشوة بطاطس مسلوقه ونعملها بيوريه مع إضافة الزبدة أو الزيت والتوابل
- أو بطاطس محمرة
- ممكن أيضا حشوة جبن شيدر أو موتزريلا ووضع معهم روزبيف أو سلامي أو بسطرمة
- ممكن نضع ايضا بداخلها حشوة دجاج بالخضار أو بانيه كرسبي أو مثلا شرائح من اللحم
الحشوات كتيرة جدا لا حصر لها وكلها طعمها مع العيش بيكون رائع
وفي حالة عدم استخدامه في نفس الوقت يفضل وضعها في أكياس محكمة الغلق ووضعه في الفريزر ووقت الحاجة نخرجه قبل بعشر دقائق فقط يصبح كأنه طازة.
ولمعرفة تفاصيل اكثر عن الوصفة والمكونات يمكنكم متابعة الفيديو
وصفة رائعة ومكوناتها بسيطة وطريقة تحضيرها بسيطة وسريعة جدا نستخدم في تسويتها المقلاة وليس الفرن. جربوها هتعجبكم جدا وبالف هنا علي قلوبكم مقدما
التعليقات مغلقة.